Jas ánshi Ábdijappar Álqoja jýyrda «Ómir men óner» baǵdarlamasyna bergen suhbatyndaǵy qojalar jaıynda aıtqan sózderi úshin halyqtan keshirim surady dep jazady Qamshy.kz aqparat agenttigi. Ánshiniń keshirim suraǵan vıdeosyn jýrnalıs Álıa Qudaıbergenova Facebook-tegi paraqshasynda jarıalady. 

«Óner men ómir» baǵdarlamasynan keıin men týraly túrli synı pikirler aıtyla bastady. Negizi ol baǵdarlamada maǵan «Qoja tek qojadan qyz alady deýshi edi. Ol úrdis qazir buzyldy ma?» degen suraq qoıylǵan bolatyn. Men onda qojalardyń arǵy jaǵyn aıta kelip, qazaqpen bite qaınasyp, qazaqtyń ortasynda qazaq bola júrgenin aıtqym kelgen. Men eshqashan «arabpyn» dep keýdemdi kótergen emespin. Men – qazaqpyn.

Jańylmaıtyn jaq, súrinbeıtin tuıaq bolmaıdy. Jańylǵan tustarym bar. Meni Ábdijappar etip kótergen halqym. Alaıda iritki salatyn jandar da bar. Men endi ǵana ósip kele jatqan jastaryńyzdyń birimin. Sózden qatelessem, keshirim suraımyn. Eshqandaı aram oıym joq!» - degen ánshi «tiri júrsem, qazaqy jaqsy kóretinimdi áli talaı dáleldermin» dep sózin qorytyndylady.

♦"Ábdijappar Álqoja, halyq aldynda keshirim sura..." - zańger

Aıta keteıik, birneshe kún buryn ánshi Ábdijappar Álqoja "31" arnanyń "Ómir men óner" baǵdarlamasynda qojalar jaıly el arasynda aıtyla bermeıtin jaıttardy atap bergen bolatyn. Ánshiniń "qojalar qazaqtan qyz alyp, qan buzyldy" degen sóz halyq arasynda daýǵa ulasyp, Álqojanyń sahnadan ketýin de talap etkender boldy. 

Usynǵan: Gúlim Jaqan