Belgili jýrnalıs Sattar Saparbekov ómirden ozypty. Marqumnyń máıiti búgin – sáýirdiń 3-i kúni saǵat 11.00-de óz otbasynan shyǵarylady eken. Bul týraly Baıbota Qoshym-Noǵaı Facebook-tegi paraqshasynda habarlady.

«Sattar Saparbekov bizden baqandaı on jas úlkendigi bar aǵamyz-tuǵyn. «On jas ol da qurdas» dep, 1971 jyly Qazaqtyń memlekettik ýnıversıtetine oqýǵa birge qabyldanyp, qatar qurbydaı bolyp kettik. Ýnıversıtetti tamamdaǵan soń uzaq jyl «Lenınshil jas» (qazirgi «Jas Alash») gazetinde qyzmet istedi. Qazaq jýrnalısıkasynda úlken orny bar qalamger Dúráli Dúısebaı feısbýktegi paraqshasynda 2017 jylǵy mamyrdyń 20-sy kúni: «Sattar aǵa Saparbekov (búginde Sattar Júsip) – qazaq jýrnalısıkasyna qomaqty úles qosqan aǵa býyn jýrnalıserdiń ortasynan oıyp oryn alatyn tulǵa. Qarapaıym, eldiń aldyna túsip ketý sekildi «jelaıaqtyq qarqyndy» tym unata qoımaıtyn, ózindik baısaldy, baıypty jolymen aqyryn júrip, anyq basqan osy aǵanyń qol astynda bir-eki jyl jumys istegenim bar. «Lenınshil jasta», artyq aýys sózi joq, bastyq retinde de óktemdik baıqatpaıtyn arda azamat. Átteń, jýrnalısıkadan sál erte ketip, «buǵyp» qalǵandaı kóringen. Biraz qıyn-qystaý kezeńdi de bastan keshti dep estip qalǵanymyz bar. Er jigittiń basyna ne kelip, ne ketpeıdi! Sattar aǵa sekildi azamattar talaı qıyndyqtan talaı ret attap-buttap ótip shyǵyp júr ǵoı. Astanaǵa ketip qalǵandyqtan ba, Almatydaǵy aǵadan qol úzip qalǵandaı edik. Sońǵy kezderi FB-da kózge túse bastady», – dep jazypty. Al dál osy kúni Ermurat Bapı: «Menen týra bir múshel úlkendigi bar aǵataıyma jelidegi belsendiligi, qoǵam ómiriniń qıturqysyna qamkóńil qasıeti, ini-qaryndastaryna ónege bolarlyq aǵalyǵy úshin tántimin», – dep lebiz bildiripti. Bul sózder jýrnalıs Sattar Saparbekovtiń qalamger retinde qadir-qasıetin ańǵartady ǵoı deımin», - dep jazdy Baıbota Qoshym-Noǵaı marqum jýrnalıs jaıynda.

Sákeńniń ımany salamat bolsyn! Janyna jannattan jaı buıyrsyn! Artynda qalǵan qos qulyny uzaq jasap, el-jurty aman bolsyn!

Usynǵan: Gúlim Jaqan