Osyndaı málimdemeler qazir ǵalamtor betterinde qaptap ketti. Óıtkeni, ótken aptada bolǵan jol apaty jolaýshylardyń ashý yzasyn týǵyzǵan sekildi. Onymen qosa, birneshe jyl buryn avtobýstardyń ıgiligine berilgen arnaıy jolaqtardaǵy jyldamdyqqa shek qoıylmaq. Bul týraly Qamshy.kz aqparat agenttigi Eýrazıa birinshi arnasyna silteme jasap habarlaıdy.
Elordadaǵy sońǵy oryn alǵan iri jol kólik oqıǵasyna baılanysty, qazir qaladaǵy qoǵamdyq kólikterde burynǵy kondýktorlar, ıaǵnı qazirgi keńesshilerdi avtobýsqa qaıta ákelý jóninde bastama kóterilip jatyr eken. Óıtkeni qazirgi, júrgizýshiler onsyz da aýyr mamandyq ıeleri kondýktorlardyń jumysyn qosa atqaryp júr. Soǵan baılanysty qazir jolda neshe túrli apattyq jaǵdaılar kóbeıipti. Al, oǵan jolaýshylardyń pikiri qandaı? .
«Kondýktor kerek. Júrgizýshi eshteńege alańdamaýy tıis. Kólik aıdap, onyń ústine adamdarǵa qyzmet kórsete almaıdy».
«Kondýktor kerek. Ol jolǵa qaraı ma álde adamdarǵa ma? Jolaýshylarǵa qyzmet kórsetetin kondýktor kerek».
«Kondýktor kerek. Avtobýs salonynda túrli jaǵdaılar bolady. Úlken kisilerge kómektesý qajet. Ol mamandarǵa kóp nárse baılanysty. Jaýaptylar osy arqyly aqsha únemdep qalýdy kózdep otyrǵan shyǵar. Biz Eýropa eli emespiz, jolaýshylardy qadaǵalaý qajet».
Al tań sáriden túnge deıin joldan kóz almaıtyn júrgizýshiler de kondýktorlardyń ózderine taptyrmas kómekshi ekenin aıtady. Óıtkeni, halyq nópiri kóp mezgilderde jolaýshylardyń kartalarynyń tólem jasaǵanyn ańǵaryp úlgermeımiz deıdi.
«Ár shopyr óz jumysyn, kondýktor óz jumysyn isteý kerek. Kóbinese jol surap, oıyńdy bóledi», - dedi qoǵamdyq kólik júrgizýshisi Nurlan Qulbalın.
Kondýktorlardyń azaıǵany dittegen jerine tegin jetkisi keletin pysyqaılarǵa da qol bolyp tur eken.
«Kondýktory joq avtobýstarǵa barsam kóp adamdar sms sms dep vodıtelderge ketip qalady. Biraq, negizinde tólemeıdi. Tek startqa qoıyp qoıady smsti tekserý kelse tóleıdi. Al, tekserý kelmese sol boıy túsip ketedi», - deıdi keńesshi Zulhamar Seıdahmetov.
İri jol apaty bolǵan kezde qarama-qarsy baǵytta ótip bara jatqan kólik júrgizýshisi Baqdáýlet sol sát áli kúnge deıin kóz aldymda tur deıdi. Toqtap, ómiri qyl ústinde turǵan 30 jolaýshyny qutqaryp qalǵan ol, kondýktorlardy alyp tastaǵaly jumysymyz birneshe ese qıyndady dep otyr.
«Artyma qaraımyn salonda úlken pasajır jigitter bar eken. Jigitter júrińizder artymyzdaǵy avtobýsty qutqaraıyq, kómekteseıik dep janyma eki úsh balany ertip alyp kettim. Bardym bizde ınstrýktaj boıynsha birinshi toqty óshirý kerek. Massany óshirýge kelmegen soń, toqty qolmen julýǵa týra keldi. Qolymmen juldym, akýmýlátordan ajyratqannan keıin artyńǵy esikti tórteýmiz baryp ashtyq», - dedi kólik júrgizýshisi Baqdáýlet Álibek.
Qaladaǵy jolaýshylar tasymalyna jaýapty kompanıa ókilderiniń aıtýynsha avtobýstar saralanǵan tarıf júıesine kóshkeli avtoparkterdiń tabysy birneshe paıyzǵa artqan. Sol sebepti, sátti júzege asqan joba toqtamaıdy. Kerisinshe, qyrkúıek aıyna deıin kondýktorlardy tolyq alyp tastaımyz dep otyr.
NAÝAT AZANBAEVA, "ASTANA LRT" JSHS QOǴAMMEN BAILANYS QYZMETİNİŃ JETEKSHİSİ:
«Birinshi avtoparkte keıbir baǵyttarda avtobýstar lyq toly. Sondyqtan olar kondýktorlardy áli shyǵarǵan joq. Nege? Birinshiden adam kóp bolǵan soń, ekinshiden keıbir adamdar kartochkany qalaı basý kerektigin bilmeıdi. Jańaǵy kondýktorlardy keńesshi retinde qaldyryp otyrmyz. Biraq, kartaǵa 98-99 % kóshsek, biz múldem kondýktorlardy da, keńesshilerdi de alyp tastaımyz».
Demek, keńesshilerdiń avtobýstaǵy kúni sanaýly. Bulaı dep LRT mamandary aıtyp otyr. Sondyqtan, jolaýshylarǵa baıbalam salmaı, engizilip otyrǵan ózgeristerge moıynsunýdan basqa amal joq sekildi.
Usynǵan: Gúlim Jaqan
