Ákimder jappaı áleýmettik jelige tirkelip, jeke nómirlerin jarıalap jatyr. Tapsyrma solaı! Osy arqyly ár saladaǵy problemalardy halyqtyń óz aýzynan estimek. Elordadaǵy birqatar sheneýnikke habarlasyp jańa ıdeıaǵa degen kózqarasyn bilgimiz kelgenimen, birqatary telefondaryn kótermedi dep habarlaıdy Qamshy.kz aqparat agenttigi týraly Eýrazıa birinshi arnasynyń deregin negizge ala otyryp.
Memleket basshysy ákimderdiń basyn qosyp jıyn ótkizgende «halyqpen baılanysty kúsheıtińder!» - dep tapsyrma bergen edi. Prezıdent aıtty, talap oryndalý kerek. Bar óńirge birinshi bolyp Nur-Sultannyń sheneýnikteri úlgi kórsetti.
Elvıra Júrgenbaeva, qala ákiminiń baspasóz hatshysy: "Nur-Sultan" qalasynyń ákimi Baqyt Turlyhanuly jeke nómirin jarıalaý arqyly halyqpen tikeleı ózderi baılanysýy qajet degen tapsyrma berdi. Ol tapsyrma oryndalýy tıis. Sondyqtan basqarma basshylary, aýdan basshylary búgingi tańda jeke suraqtarǵa jaýap berip , turǵyndar qandaı da bir problemamen shaǵymdansa sol problemany sheshý jolynda ózderi aınalysyp jatyr. Bul halyqqa kerek dep oılaımyn, halyqpen tyǵyz baılanysta bolýy úshin, pikirin bilý úshin. Durys dep oılaımyn. Bir ǵana sol jarıalaýmen toqtap qalmaı biraz halyqty ózine shaqyryp jobalaryn ár aı saıyn bolmasa,maýsym saıyn jarıalap otyrsa nur ústine nur bolady — deıdi.
Dál osy aqparat shyqqan soń atqarýshy bılik ókilderi halyqpen baılanysty kúsheıtetin bolypty dep bir qýandyq emes pe? Nur-Sultan qalasyndaǵy aýdan ákimderine qońyraý shalyp kórdik.
Aldymen Esil aýdanynyń ákimi Tólegen Zakarıanovqa habarlasaıyq.
«Abonent qońyraý qabyldaı almaıdy»
Telefony sónip tur. Bir sharýalarmen júrgen shyǵar, bilmeımiz. Ári qaraı kettik. Endigi kezekte jańadan qurylǵan Baıqońyr aýdanynyń ákimi Erlan Qanalımovqa habarlasaıyq.
Habarlastyq, almaıdy.
Baıqońyr aýdanynyń ákimi de telefonyn kótermedi. Úmitimizdi úzbeıik. Endi Saryarqa aýdanynyń ákimine habarlasamyz.
Habarlastyq. Almaıdy.
Saryarqa aýdanynyń ákimi de jaýap bermedi. Al endi Almaty aýdanynyń ákimine habarlastyq, almaıdy.
Bahtıar Máken, QR Parlamenti májilisiniń depýtaty: Jaýap bergennen keıin sapasyna qaraý kerek. Ol nómirdi berip qoıyp, erteń durys deńgeıde jaýap berip halyqtyń kóptegen suraǵyna dúrys jaýap berse durys. Biraq erteń ol nómir qur kózboıaýshylyq úshin tursa durys emes.
Álbette joǵarydan tapsyrma berilse, oryndaýy shart. Biraq sol istiń ózin aqylǵa salyp atqarsa kem -ketigi bolmas edi. Bloger Amangeldi Qurmetuly osyny mysalǵa keltiredi. Jaqsy, ákimder men bólim basshylarynyń nómirin jazyp qoıdy delik. 1 mıllıon astam turǵyny bar shahardyń sheneýnikteri qaısybirine jaýap berip úlgeredi degen zańdy suraq týyndaıdy.
Amangeldi Qurmetuly, jýrnalıs: Messendjerde sizge talap qoıyp otyrǵan, máselesin qoıyp otyrǵan adamnyń derekteri naqty kórsetilip turady. Aýdıojazba joldasańyz da, jazbasha suraq qoısańyz da,ol tirkelip otyrady. Al telefonmen "men sizge habarlasyp aıtalyq máselem bar"desem, ony qanshalyqty tirkep otyrý múmkindigi bar. Kólikte kele jatýy múmkin, jınalysta otyrýyńmúmkin. Sondyqtan birden telefon bergen kezde sol ákimniń, basqarma basshysynyń qatysýymen qurylǵan túrli toptardyń, messendjer toptardyń bolǵany durys pa degen azamattyq kózqarasym bar.
Jýrnalısiń aıtýy oryndy-aq. Biraq tájirıbeli SMM, MMM mamandardy ákimdikke jumysqa alý úshin olardyń suraýyna saı jalaqy tóleý kerek. Áıtpeseń óz isin jaqsy biletin ákki qyzmetkerdi az aqshaǵa ala tańnan keshke deıin keńsede otyrǵyzyp qoıa almaısyń. Ákimder men bólim basshylarynyń nómiriniń jarıalanǵanyna 6 kún boldy. Birazy telefonyn kótermedi. Shaǵym tyńdap sharshap qalǵan bolar. Ári qaraı bul naýqan qalaı jalǵasady eken. Ony da kórermiz.
Usynǵan: Farıza Jomartqyzy
