Qaraǵandy oblysynda áıeli men qyzyn qaǵyp óltirgen júrgizýshige úkim shyqty, dep habarlaıdy Qamshy.kz aqparat agenttigi Sputnik Qazaqstan saıtynyń deregine súıenip.

Qaıǵyly oqıǵa 2018 jyldyń qarashasynda Qaraqudyq aýylynan úsh shaqyrym jerde bolǵan. Keshkisin otbasy Qaraǵandydan shyǵyp, úıine kele jatady. Olar qaladaǵy týystarynyń úılený toıyna barypty. Negizinde rólde sottalýshynyń baýyry otyrǵan edi, sebebi er adam ishimdik ishetinin bilip, toı aldynda kólikti aıdap qaıtýdy ótingen. 

Biraq qaıtar jolda mas er adam kólikti ózim júrgizemin dep aıǵaıǵa basady. Áıelimen de, baýyrymen de janjaldasyp, kóliktegilerdiń bárin syrtqa qýyp shyǵady.

Áıel qyzymen birge aýylǵa qara jaıaý júre beredi, olar asfált joldan shyǵyp, jan jolmen ketip bara jatqan. Sottalýshynyń baýyry olardan birneshe metr ozyp ketedi, taǵy bir jolaýshy áıel – sol aýyldyń turǵyny, kerisinshe, artta qalyp qoıypty. Rólge mingen mas otaǵasy sanaýly mınýttarda áıeli men qyzyn qaǵyp ketedi.

Sottalýshynyń aıtýynsha, rólge qalaı otyrǵanyn bilmeıdi eken, soqqydan soń ǵana esin jıǵan. Atyp shyǵyp qarasa, qyzy jolaýshy áıeldiń qolynda, áıeli kóliktiń art jaǵynda alty metrdeı jerde jatyr. Áıel sol jerde jan tapsyrsa, aýrýhanaǵa jetkizilgen jeti jasar qyz birden komaǵa túsken. Mıyna qatty zaqym kelip, ózdiginen tynys ala almaǵan kórinedi. Dárigerler balanyń ómirin saqtap qalý úshin konsılıým shaqyrypty, biraq jaraqaty tym aýyr bolǵandyqtan, búldirshin qyz bir táýlikke jetpeı kóz jumady.

Otaǵasy kinásin tolyǵymen moıyndady. Sot ony 345-baptyń 4-bólimi boıynsha aıypty dep tanyp, bes jylǵa bas bostandyǵynan aıyrdy. Sondaı-aq kólik aıdaýǵa tyıym saldy.

Usynǵan: Nazerke Labıhan