Pavlodar oblysy Aqsý qalasynda er adam óz-ózin órtep jiberdi: bir adam qaza taýyp, on úsh adam zardap shekti, dep habarlaıdy Qamshy.kz aqparat agenttigi  pavlodarnews.kz caıtyna silteme jasaı otyryp.

3 sáýirde  saǵat 20:51-de Aqsý qalasy B. Momyshuly kóshesinde jeke turǵyn úıdiń janyp jatqany týraly habar kelgen. Oqıǵa kýágerleriniń aıtýynsha, sol kúni qaza tapqan  adamnyń áıeliniń týǵan kúni bolǵan eken. Qonaqtar dastarhan basyna jınalǵanda, 50 jastaǵy úı ıesi ketip qalady da, bes lıtr benzın ákelip, "balalardy alyp ketińder" dep aıtqan. Áıeli onyń aıtqanyn oryndaǵan boıda er adam sirińkeni jaǵyp, ózin órtep jibergen. Dostary ony toqtatýǵa tyrysqan. Kúıik shalǵan er adam Aqsý qalasynyń ortalyq aýrýhanasyna jetkizilgenimen, ony aman saqtap qalý múmkin bolmapty.

Órttiń saldarynan 13 adam zardap shekti: tórt adam jansaqtaý bóliminde jatyr, bes adam men tórt bala ıis gazynan ýlanyp, jansaqtaý bólimine jetkizildi, dep habarlady oblystyq jedel járdem stansıasy.

Órt aýmaǵy 30 sharshy metr boldy. Úsh bólmeli baspananyń as bólmesi, jıhaz, turmystyq tehnıka jáne basqa zattar túgel janyp ketken. Úıdiń shatyry da opyrylyp qulapty.

Usynǵan: Farıza Jomartqyzy