Qazaqstan Respýblıkasynyń Tuńǵysh Prezıdenti – Elbasynyń tóraǵalyǵymen keńes ótti dep habarlaıdy Qamshy.kz aqparat agenttigi Aqordaǵa silteme jasaı otyryp.
Jıynǵa Qazaqstan Respýblıkasynyń Tuńǵysh Prezıdenti – Elbasy Keńsesiniń Basshysy M.Qasymbekov, Qazaqstan Respýblıkasynyń Tuńǵysh Prezıdenti – Elbasynyń Kómekshisi – Qazaqstan Respýblıkasynyń Prezıdenti İs Basqarýshysynyń Birinshi orynbasary A.Bısembaev, Qazaqstan Respýblıkasynyń Tuńǵysh Prezıdenti – Elbasy Keńsesiniń, sondaı-aq Tuńǵysh Prezıdent Qory men kitaphanasynyń qurylymdyq bólimsheleriniń jetekshileri qatysty.
Jıyn barysynda Elbasy Nursultan Nazarbaevqa Qazaqstan Respýblıkasynyń Tuńǵysh Prezıdenti – Elbasy Keńsesiniń qyzmetine baılanysty uıymdastyrýshylyq-quqyqtyq máselelerdiń aıaqtalǵany jóninde baıandaldy, sondaı-aq, Qazaqstan Respýblıkasynyń Tuńǵysh Prezıdenti – Elbasy Keńsesine kadrlardy irikteý jumystarynyń nátıjeleri týraly aqparat usynyldy.
Nursultan Nazarbaev Tuńǵysh Prezıdent Keńsesiniń aldyna qoıylǵan mindetterdiń ýaqtyly jáne tıimdi oryndalýyn qamtamasyz etý qajettigin atap ótti.
"Men Tuńǵysh Prezıdent – Elbasynyń tıisti konstıtýsıalyq zańmen retteletin mindetterin atqarýǵa kiristim. Sonymen qatar, men Qaýipsizdik Keńesiniń, Qazaqstan halqy Assambleıasynyń tóraǵasymyn, «Nur Otan» partıasyna basshylyq etýdi jalǵastyra beremin. Aldymyzda aýqymdy jumys tur. Osy qyzmetti qamtamasyz etý úshin Tuńǵysh Prezıdenttiń Keńsesi quryldy. Uıymdastyrý máseleleriniń barlyǵy sheshildi. Endi bárimiz júktelgen mindetterdi oryndaýǵa kirisýimiz kerek", – dedi Elbasy.
Nursultan Nazarbaev memleketti odan ári damytý jónindegi strategıalyq mindetterdi sapaly sheshý maqsatymen vedomstvoaralyq ózara tıimdi yqpaldastyq ornatýdyń qajettiligin aıtty.
"Búginde Prezıdent te, Úkimet te men bekitken baǵdarlamalyq qujattarda, Joldaýda qamtylǵan, sondaı-aq partıa sezinde aıtylǵan mindetterdi oryndaý baǵytynda jumys isteýde. Bárimiz Qazaqstannyń ıgiligi úshin, elimizdiń turaqtylyǵyn, birligi men damýyn qamtamasyz etý úshin jumys isteýge tıispiz. Bul – bárimizge ortaq mindet", – dedi Nursultan Nazarbaev.
Qazaqstannyń Tuńǵysh Prezıdenti qoǵamdyq mańyzy bar bastamalardy júzege asyrýdyń mańyzdylyǵyna basa mán berdi. Bul rette, Elbasy Nursultan Nazarbaev Tuńǵysh Prezıdent qorynyń talantty jastarǵa jan-jaqty qoldaý kórsetýge baǵyttalǵan jobalaryn iske asyrýdyń ózektiligin atap ótti.
Jıyn qorytyndysy boıynsha Elbasy birqatar naqty tapsyrma berdi.
Usynǵan: Farıza Jomartqyzy
