Oral qalasyndaǵy Nazarbaev zıatkerlik mektebiniń 12S synybynda oqıtyn Alına Moldaǵalıeva – «Altyn belgiden» úmitker úzdik oqýshy. Bilimpaz óren qazirdiń ózinde AQSH pen Gonkongtiń 11 joǵary oqý ornynan shaqyrtý aldy dep habarlaıdy Qamshy.kz aqparat agenttigi egemen.kz saıtyna silteme jasap.

Alınanyń tańdaýy AQSH-tyń Pensılvanıa shtaty Fıladelfıa qalasyndaǵy Drexel University bilim ordasyna túsip tur. Ol munda Chemical Engineering (hımıalyq ınjeınerıa) mamandyǵy boıynsha bakalavr jáne magıstr dárejesin alyp shyqpaq. Bilimdi boıjetken bul múmkindikke AQSH prezıdentiniń grantyn jáne Drexel bilim grantyn utyp alyp qol jetkizgen.

Alına Moldaǵalıeva budan bólek Máskeý fızıka-tehnıka ınstıtýtynda ótken halyqaralyq hımıa olımpıadasynyń júldegeri, BUU modeli mektep konferensıasynyń Best Speech Certificate (Úzdik sóz) sertıfıkat ıegeri, FLEX lıder almasý baǵdarlamasynyń fınalısi, AQSH-tyń Johns Hopkins University oqý ornynda ótken CTY qatysýshysy, shańǵy jarysynan qala chempıony, sporttyq-baldyq bı boıynsha oblys jeńimpazy atanǵan, san qarly talant ıesi. Áleýmettik ortadaǵy qozǵalystarǵa da belsene aralasatyn Alına Ironman 70.3 Astana jáne Global Conference on Primary Health Care sekildi iri halyqaralyq sharalarǵa volonter bolyp qatysqan.

Zıatkerlik mekteptiń maǵan bergen múmkindigine zor jaýapkershilikpen qaraımyn. Men ıelengen 11 oqý grantynyń altaýy tolyq grant bolsa, qalǵan ýnıversıtetter oqýǵa jeńildik usyndy. Men tańdaǵan Pensılvanıa shtatyndaǵy Drexel ýnıversıtetiniń bir artyqshylyǵy – 1-kýrstan bastap kompanıalarda jumys istep, tájirıbe jınaqtaýǵa múmkindik beredi. Keleshekte Otanyma kelip, hımıalyq ınjenerıa salasyn damytqym keledi, - deıdi Alına.

Usynǵan: Maqpal Sembaı