«Aq jol» partıasynyń atynan óz kandıdatýralaryn usynǵan prezıdenttikke úmitkerler qataryna Májilis depýttattary qosyldy, dep habarlady partıanyń baspasóz qyzmeti Qamshy.kz aqparat agenttigine.

«Aq jol» partıasynyń atynan ózderiniń kandıdatýralaryn usynǵan prezıdenttikke úmitkerler qataryna Májilistiń 5 jáne 6 shaqyrylymynyń depýttattary qosyldy – bankır, aqtóbelik Danıa Espaeva jáne Nur-Sultan qalasyndaǵy Qazaqstan Qurylysshylar odaǵynyń basshysy Talǵat Erǵalıev. Olar da ózderiniń kandıdatýralaryn qoldaýdy surap partıalastaryna arnaıy beıneúndeý joldady.

Eske sala keteıik, partıanyń saılaýǵa qatysýy jáne úmitkerlerdi usyný týraly sheshim osy jyldyń 24 sáýirinde ótetin sıeze qabyldanady. 13 sáýirdegi «Aq jol» Ortalyq keńesiniń plenýmy prezıdenttik saılaýǵa úmitkerlerdi anyqtaı almady.

Budan buryn partıa múshelerine ózderiniń úndeýlerin Óskemen qalalyq máslıhatynyń depýtaty Qýat Rahımberdın jáne Taraz qalalyq máslıhat depýtaty Asan Qoshmambetov, Atyraýdan Serik Erýbaev, sondaı-aq óziniń sheshimi jóninde 13 sáýir kúni ótken Ortalyq Keńestiń plenýmynda málimdegen belgili zańger Evgenıı Kınsel de joldaǵan bolatyn.

Búgin Danıa Espaevanyń (Májilis depýtaty, Aqtóbedegi eń iri bankterdiń fılıaldaryn birneshe jyldar boıy basqarǵan) jáne Talǵat Erǵalıevtiń (Májilistiń 5 shaqyrylymynyń depýtaty, Qazaqstan Qurylysshylar odaǵynyń tóraǵasy) beıneúndeýleri jarıalandy.

Partıanyń zań qyzmetiniń habarlaýynsha, úmitkerlerdiń kandıdatýralaryn usyný tizimi osymen támamdaldy.

Usynǵan: Nazerke Labıhan