Prezıdent saılaýynyń dúbiri estile salysymen áleýmettik jeli men chattarda «Aq joldan» saılaýǵa kim túsedi? Azat Perýashev nemese siz túsetin bolarsyz?» degen saýaldar kóp qoıyla bastady. Al 24 sáýirdegi prezıdenttikke úmitker anyqtalǵan partıa quryltaıynan soń endi «Nege siz saılaýǵa túspedińiz? Biz sizdi túsedi dep úmittenip edik?»-degen saýaldar qaptaı bastady. Keshe Shymkentke, Túrkistan oblysyna barǵanda da saıasattan xabary barlardyń kóbisiniń, ásirese, el aǵalarynyń eń aldymen qoıǵan suraǵy osy boldy…

«Aq jol» partıasy tóraǵasy Azat Perýashev bul máselege baılanysty quryltaı ústinde-aq ózine baılanysty da, maǵan baılanysty da jaýabyn berdi. «Qazekeńe baılanysty aıtarym, partıadaǵy zıaly qaýym ókilderiniń Prezıdenttikke úmitkerlikke túse almaýyna memlekettik qyzmettegi keminde 5 jyl qyzmet ótiliniń bolmaýy sebep boldy» dedi.

Iá, negizi Prezıdent saılaýyna 30 jyldan beri alǵash ret Elbasy Nursultan Nazarbaev qatyspaıtyndyqtan, úmitkerler burynǵydan eki-úsh ese kóp bolýy kerek edi… Biraq, ótkende Ulttyq kitapxanadaǵy qazaq qalamgerleriniń jıynynda da aıttyq, bul jerde Saılaý týraly zańnyń bir kemshiligi, Prezıdenttikke úmitker bolyp, memlekettik qyzmette 5 jyl istegen sheneýnikter ǵana tirkele alatyndyǵynda bolyp tur… Bes jyl memlekettik qyzmet ótili bar, jasy 40-tan asqan adamdy izdesek, búkil halqymyzdyń 10 paıyzyna da jetpeıdi eken… Sonda qalǵan halyqtyń Prezıdent saılaýyna qatysý quqy shektele bermek pe? Qazaǵym dep, qabyrǵasy qaıysyp, qaırat kórsetip júrgen qaıratkerler de, kásibi arqyly eldiń násibin arttyryp júrgen kásipkerler de, ultyma bolsyn dep júrgen ult zıalylary da bes jyl memlekettik qyzmette istemegendikten, Prezıdent saılaýyna qatysa almaı qaldy… Bizdiń zańdarymyz boıynsha alpaýyt el AQSH-tyń Prezıdenti, mıllıarder Donald Tramp ta, Prezıdent bolmaq túgili, saılaýǵa úmitker bolyp tirkele almaıdy… Bul talap «Árkim saılaýǵa da, saılanýǵa da quqyly» degen Konstıtýsıamyzdyń. ???…. .babyna qaıshy bolyp tabylady.

Bıylǵy saılaýda kim Prezıdenttikke úmitker bolyp tirkelse de, tipti qudaı qoldap Prezıdent bolsa da, eń aldymen elden alar basty amanatynyń biregeıi Ulttyq múddemizdi qorǵaý bolýy tıis! Ulttyq múdde degenimiz mańyzy áleýmettik-ekonomıkalyq áleýetterdi arttyrýdan esh kem emes – Memlekettik tilden bastalady! Bizde osy otyz jyldaı ýaqytqa deıin Memlekettik til týraly Zań qabyldanǵan joq! Sol baıaǵy Keńes Odaǵy kezindegi – qyzyl ımperıaǵa otar kezimizde qabyldanǵan Tilder týraly zańdy jamap-jasqaýmen kelemiz… Ózge táýelsizdik alǵan memleketterdiń bári bul eń basty máselelelerdiń biri – Memleketik Tildi sol kezde-aq, baıaǵyda sheship alǵan.

Tiliń bolsa ǵana – Tiriligiń aıqyn, Tirligiń jarqyn! Otyz jylǵa jýyq ýaqyt Konstıtýsıadaǵy Memlekettik tildiń zańdy tórine shyǵýyna, qoǵamdyq-saıası álemde tolyq qoldanýyna tosqaýyl – temir tejegish bolyp kele jatqan Konstıtýsıa men Til týraly zańdarymyzdaǵy orys tili týraly tarmaqtardy alyp tastaýǵa tıispiz. Óıtkeni, 7 baptyń 1-shi tarmaǵy gaz bolsa, 2-shi tarmaǵy, ıá, gazdy basýǵa mursha bermeıtin temir tejegish. Biz, ásirese, ult zıalylary osy saılaýda Prezıdenttikten úmitkerlerden osyny talap etýimiz kerek! Áıtpese, bizdiń Tilimizdiń tirligi – baıaǵy Brejnevtyń toqyraý zamanyn kelekelegen anekdottaǵydaı, «Toqtap qalǵan tramvaıdy júrip kele jatyr dep oılasyn, jolaýshylar, oryndaryńda selkildep otyryńdar»-degendeı múshkil axýal…

Saılaýdaǵy eń basty másele – Saılaý týraly zańymyzǵa aldaǵy parlament saılaýyna deıin ózgerister engizýge tıispiz! Áıtpese, qazirgi Saılaý týraly zańnyń kóp kemshiligi talaıdan beri aıtylyp keledi. Óıtkeni, qazirgi zańymyz boıynsha kez kelgen adamdy Prezıdent etip ótkizýge bolady…

Biraq, Saılaýǵa túsýge quqymyz joq bolsa da, Saılaýǵa xaqymyz bar, sondyqtan ózimizdiń azamattyq quqymyzdy oryndap, qalaǵan úmitkerimizge daýys berý paryzymyz.

Qazaqstan Prezıdenti Qasym-Jomart Toqaevtyń «Prezıdent saılaýy ádil de, ashyq, taza ótedi dep kepildik beremin»-degen sertti sózine senim bildire otyryp, Prezıdenttikke úmitkerlerge Aq jol tileımiz!

Qazybek ISA,

«Aq jol» partıasy tóraǵasynyń orynbasary