Bul týraly «Nur Otan» partıasy Tóraǵasynyń Birinshi orynbasary #NurOtanPikir erkin pikirtalas alańynyń kezekti otyrysynda aıtty.

Otyrysta «Jastar jyly» aıasynda atqarylyp jatqan sharýalar, jastardy baspanamen jáne jumyspen qamtý máseleleri, jas býyndy áleýmettik qoldaý sıaqty mańyzdy jaıttar sóz boldy.

Budan basqa is-sharada aýyl jastaryna qatysty másele de kóterildi. Atalǵan másele jaıynda Máýlen Áshimbaev aýyl jastarynyń básekege qabiletti bolýy úshin jergilikti mektepterdiń bedelin arttyryp, olardyń bilim deńgeıin kóterý kerektigin aıtty.

Al jastardy durys tárbıeleý isine qatysty «Nur Otan» partıasy Tóraǵasynyń Birinshi orynbasary eń aldymen óskeleń urpaq arasynda durys qundylyqtar qalyptastyrý kerektigine nazar aýdardy.

– Jastardy tárbıeleý, jańa zaman tulǵalaryn qalyptastyrý týraly aıtqanda, jas býyn arasynda durys qundylyqtardy qalyptastyrýdy eskerýimiz kerek. Sonyń ishinde adamgershilik, qarapaıymdylyq, eńbekqorlyq, tabandylyq sıaqty qasıetterge basymdyq bergen jón. Munyń barlyǵy kózdegen maqsatqa jeteleıtin qadamdar. Bul iste, aǵa býynǵa, ıaǵnı bizge, sondaı-aq zıaly qaýymǵa júkteler jaýapkershiliktiń júgi aýyr, – dedi Máýlen Áshimbaev.

Odan bólek, is-shara barysynda Aqparat jáne qoǵamdyq damý vıse-mınıstri Juldyz Omarbekova, belgili aqyn, Qazaqstan Jazýshylar odaǵynyń múshesi, «Shalqar» radıosynyń dırektory Qalqaman Sarın, kásipker, İT tehnologıalar salasynda qyzmet kórsetetin STEM akademıasynyń negizin qalaýshy Ábýtálip Mútáli, «Qazaqstan» ulttyq telearnasynyń júrgizýshisi Áıgerim Esenáli, «Nur Otan» partıasy Baspasóz qyzmetiniń basshysy Maksım Spotkaı jáne «Jas Otan» jastar qanatynyń atqarýshy hatshysy Dáýlet Káribek kóterilgen taqyrypqa qatysty óz oılaryn aıtyp, pikirlerin bildirdi.