Rınat Zaıytov 2 mamyrda tikeleı efırge shyǵyp, saılaýǵa baılanysty óz oıyn bildirdi dep jazady Qamshy.kz aqparat agenttigi. Atalmysh vıdeo Youtube arnasyna jarıalandy. 

Tikeleı efır kezinde tanymal aıtysker óziniń Ámirjan Qosanovty qoldaıtynyn aıtty. 

"Men Ámirjan Qosanovpen jaqyn aralaspaımyn. Degenmen sálemimiz túzý, Qudaıǵa shúkir. Partıanyń atynan Ámirjan Qosanovty usynǵan kezde birden qoldaı kettim. Qazirgi kezeńde belgili bir qıturqy jaıttar bolady. SaMysaly 118 myń adamnyń qoly kerek dese, olardyń qatarynda birneshe bıliktiń arnaıy adamdary bolýy múmkin. Keıin ýaqyt aıaqtalǵan kezde "biz qol qoımadyq", - dep shý shyǵarýy ábden múmkin. Sol sebepti barynsha artyq qol jınaýǵa tyrysamyz. Qol jınaýǵa men ózim de baratyn shyǵarymyn. Negizinen túrli alypqashpa pikirler kóp. Biraq meniń oıymsha, osy saılaý sońǵy 30 jyldyń ishindegi bizdiń eń sońǵy múmkindigimiz. Bul sońǵy múmkindik. Eger qaıtadan burynǵy bılik qaıtadan atqa qonyp, qaıtadan óziniń aınalasyn qorshap-qorǵashtap, ózderine yńǵaıly zańdar shyǵaryp alatyn bolsa, biz keminde taǵy 30 jyl dál osylaı ómir súretin bolamyz", - dedi Rınat Zaıytov. 

Sondaı-aq Rınat Zaıytov Imanǵalı Tasmaǵambetov týraly oıyn da ashyq aıtty. 

"Onyń saılaýǵa ne sebepti qatyspaǵanyn men bilmeımin. Alaıda sońǵy 10 jyldyń ishinde Imanǵalı aǵamyz "el bolaıyq" dep úndeý tastaıtyn shyǵar dep úmittengen qazaqtardyń biri menmin. Onyń saılaýǵa qatyspaǵany taza óz erki-aý deımin. Múmkin bıliktiń erki shyǵar. Men bul týraly bilmeımin. Biraq onyń saılaýǵa qatysqanyn qalaǵan qazaqtardyń birimin", - dep pikir bildirdi aıtysker aqyn. 

Tikeleı efırdiń kórermenderiniń biri "Ámirjan Qosanov naǵyz halyqtyń adamy bolsa bılik onyń saılaýǵa qatysýyna nelikten jol berip otyr" dep suraq qoıdy. Rınat Zaıytov bolsa Ámirjan Qosanovtyń saılaýǵa deıin qatty ári muqıat daıyndalǵanyn aıtty. 

"Ámirjan aǵa saılaýdan buryn muqıat daıyndaldy. Sebebi neshetúrli kedergiler bolatyn bildi. Sol sebepti biz syrttaı tileýin tilep, taqym qysyp otyrdyq. Degenmen bul suraqty qol jınaý aıaqtalǵan soń qoıý kerek sekildi. Sebebi áli kúnge deıin bizdiń boıymyzda qorqynysh bar. Qazirgi tranzıttik prezıdent ýádesin berdi, sózin berdi. Bizdi saılaýdyń ádiletti ótetinine sendirdi. Er azamat qoı. Eki sóılemeıtin shyǵar. Qashanǵy eki sóıleıdi. Saılaýdan keıin qoǵamnyń ózi qozǵalyp ketetin shyǵar. Alaıda dál qazir bir jeńnen qol, bir jaǵadan bas shyǵarý bizdiń mindetimiz. Qazir "Ult taǵdyrynyń" aınalasyna jınalǵan azamattardyń erkin oılanýǵa shamasy qalǵan adamdar. Árkimniń tańdaýy óz erkinde. Men Toqaevqa daýys beretinderdi de túsinemin. Basqa da kandıdattarǵa daýys beretin adamdardy túsinýge tyrysamyn. Sebebi árkimniń óz shyndyǵy bar. Biraq men Qosanovqa daýys beremin. Óıtkeni kandıdattardyń ishindegi "bul júıeni toqtatý kerek" degen óz ustanymy bar adamǵa men senemin" - deıdi Rınat Zaıytov. 

Aıtysker aqyn óziniń de ne sebepti saılaýǵa túspegenin túsindirdi. 

"Meniń birinshiden jasym kelgen joq. Ekinshiden, ózimdi eldi basqara ketetin adam retinde sanamaımyn. Eger 10-15 jylda halyqaralyq máselelerdi sheshe alatyn jaǵdaıǵa jete alsam qatysatyn shaǵarmyn", - deıdi Rınat Zaıytov. 

Daıyndaǵan: Ásel Bolatqyzy