Almatydaǵy marafon kezinde "Shyndyqtan qashyp qutylmaısyń" degen jazýy bar banner ilgeni úshin 15 kúnge qamalǵan Ásıa Tólesova men Beıbarys Tolymbekovke qamaý ornynda qoqan-loqy jasap, kúsh kórsetken dep jazady Qamshy.kz aqparat agenttigi Azattyqtyń deregin negizge alyp. Bul aqparatty 4 mamyrda Ásıa Tólesovanyń jaqyndary habarlaǵan.

"Qazir advokaty shyqty. Beıbarysqa da, Ásıaǵa da qoqan-loqy jasap jatqany anyqtaldy. Ásıa otyrǵan kameraǵa Tolǵanaı esimdi qyzdy kirgizgen. Ol prezıdenttiń jıeni ekenin, olarǵa (Ásıa, Beıbarys - JJ.) qarsy ekenin aıtyp, saıası áńgimege tartqan. Judyryǵyn kórsetip, tóbeleske beıim ekenin bildirgen. Ásıanyń ishinen urǵan. Ashtyq aksıasyn jalǵastyryp jatqan Ásıa óte álsiz. Ol kameradan shyǵyp, qaıta kirgisi kelmeıtinin aıtqan. Jańaǵy qyz únemi aıqaılap sóılep, agresıa tanytqan. Olar Ásıany qandaı da bir tártip buzýǵa ıtermelep, taǵy da sol jaqta qaldyrǵysy keledi. Bul óte qaýipti" dedi 4 mamyrda tústen keıin Ásıa Tólesovanyń anasy Janar Jandosova Azatyq tilshisine.

Ol Facebook jelisinde Ásıanyń jazǵan hatynyń sýretin de jarıalap qoıǵan.

Ol 4 mamyrda Ásıa Tólesovanyń advokaty Janar Balǵabaevamen birge Almaty qalalyq prokýratýrasyna baryp, shaǵym túsiretinin aıtty.

"Erteń jeksenbi. Jumys kúni emes. Olar kez kelgen nárseni jasaı alady" dep alańdaıdy Janar Jandosova.

Janar Jandosovanyń aıtýynsha, Ásıa 4 mamyrda ákimshilik jazaǵa tartylǵandarǵa arnalǵan arnaıy qabyldaý ornynyń basshysy Qaharov A.A esimdi azamattyń atyna shaǵym túsirip, atalǵan kamerada otyrýdyń qaýipti ekenin jazǵan.

Arnaıy qabyldaý orynǵa habarlasqan kezde ózin Arsen Marat dep tanystyrǵan arnaıy qabyldaý ornynyń qyzmetkeri Ásıa Tólesovanyń sol jerde otyrǵanyn rastady. Biraq naqty qansha adammen otyrǵany jaıly aqparatty aıta almaıtynyn jetkizdi. Ol Ásıanyń qabyldaý orny basshysyna shaǵym túsirgenin rastap, basshylyqtyń oǵan búgin jaýap bergenin aıtty. "Ne dep jaýap berdi?" degen suraǵymyzǵa Arsen Marat "aıta almaımyz" dep qysqa qaıyrdy.

Ásıa Tólesovanyń ashtyq aksıasyn jalǵastyryp jatqanyn aıtqan qyzmetker "onyń jaǵdaıy bir qalypty" dedi.

"Kún saıyn polısıa departamentiniń aýrýhanasynan terapevt kelip, kúnde jaǵdaıyn qaraıdy. Jaǵdaıy bir qalypty jaqsy. Ár úsh saǵat saıyn onyń qysymyn tekseredi" dedi Arsen Marat.

Onyń aıtýynsha, Beıbarys Tolymbekovten eshqandaı shaǵym túspegen. "Onyń jaǵdaıy jaqsy" dedi.

21 sáýirde Almatyda marafon kezinde "Shyndyqtan qashyp qutylmaısyń" degen jazýy bar banner ilgeni úshin belsendi Ásıa Tólesova men Beıbarys Tolymbekovti sot 15 táýlikke qamaǵan edi.

Tólesova men Tolymbekov qamalǵan kúnniń ertesine Almatyda otyz shaqty adam qalalyq sot ǵımaraty aldyna kelip, qamaýdaǵy belsendilerdi bosatýdy talap etti. Áleýmettik jeli qoldanýshylary da jastardyń ustalýyn aıyptap, ınternette qoldaý kórsetti. Al Qazaqstannyń ishki ister mınıstri Erlan Turǵymbaev jastardyń "marafon ótkizýge kedergi jasaǵanyn" aıtty.

Sáýir aıynyń aıaǵynda álemniń túkpir-túkpirinde oqyp jatqan Qazaqstan stýdentteri Chehıa, Fransıa, Ulybrıtanıa men Vengrıadaǵy Qazaqstan elshilikteri aldynda qamalǵan belsendilerdi qoldaý aksıasyn ótkizdi. Mundaı qoldaý sharalary Kanada, Italıada, Reseı, AQSH-da ótti.

Halyqaralyq quqyq qorǵaý uıymdary - Freedom House, Amnesty International jáne BUU-nyń Adam quqyǵy boıynsha Ortalyq Azıadaǵy keńsesi Qazaqstan bıligin Ásıa Tólesova men Beıbarys Tolymbekovti bosatýǵa shaqyrǵan.

Usynǵan: Ásel Bolatqyzy