94 jastaǵy UOS ardageri – Ivan Sýrkov osydan bir aı buryn týysqanyn óltirgeni úshin tórt jylǵa sottalǵan edi. Soǵys ardagerimen birge jazasyn ótep jatqan qylmyskerler ony alda kele jatqan Jeńis kúnimen quttyqtaǵan. Arnaıy jabdyqtalǵan sahna, án aıtqan taǵdyrlastary qarttyń kózine jas alýyna sebep boldy dep habarlaıdy Qamshy.kz aqparat agenttigi alau.kz saıtyna silteme jasap.

Túrli rýhty urandar jazylǵan plakattar sahna tórine ilinip, jaza óteýshiler soldattardyń qalaıy ydysynan "Máńgilik alaý" jasady.

Túrli marapattardyń ıesi Ivan Vladımırovıch keýdesi syńǵyrlaǵan ordenge toly kostúmin úıde qaldyrǵan. Endi onyń ústinde túrmedegi kádimgi biryńǵaı forma. Onyń QK 161/2 bóliminde jazasyn ótep jatqanyna bir aıdan asa ýaqyt boldy. Ardager úshin eń qymbatty merekelerdiń biri endi túrmede toılanyp jatyr. Bir jerde jatatyn taǵdyrlastar ishinde Ivan Sýrkovtyń oryny erekshe. Ol – atalmysh nysandaǵy eń qartań qylmysker.

"Jazasyn óteýshilerdiń erki boıynsha jáne basshylyqtyń qoldaýymen jalǵyz ardager úshin biz osy konsertti uıymdastyryp otyrmyz", - deıdi QK 161/2 bóliminiń otrád basshysy Baýyrjan Keńesbaev.

Basshynyń aıtýynsha, qazirgi ýaqytta soǵys kýágeri sanatorıalyq bólimde. Onyń densaýlyǵy úshin kelgen kúnnen bastap sheni bar dárigerler jaýapty. Psıholog turaqty túrde jumys jasap jatyr eken.

"Biz oǵan eshqandaı qysym kórsetip jatqan joqpyz. Ol qalaýynsha teledıdar qarap, kitap oqyp jáne krosvord sheshe alady", - dedi Keńesbaev.

Ivan Vladımırovıch bıyl 94 jasqa tolady. Ony maıdanǵa 1943 jyly Qostanaı aýdanynan shaqyrǵan. Eń qyzyǵy – Ivan Sýrkov maıdanǵa shaqyrylǵan ýaqytta 10-synyptyń oqýshysy edi. Alǵash ret urysqa Kýrsk-Orlov aýmaǵynda qatysty. 4-shi Ýkraına frontynda shaıqasyp, Donbassty, Zaporojeni, Evpatorıý qalasyn, Sevastopoldi bosatýǵa belsene qyzmet etken.

3-shi Belarýs jáne Baltyq jaǵalaýy maıdandaryn basyp ótip, Rıga men Tallındi jaýdan azat etken jaýynger eki ret basynan jaraqat alǵan. Osy erlikterin eskere otyryp, jazasyn óteýshi taǵdyrlastary ony quttyqtaýǵa bel býǵan eken.

"Biz ardager Ivan Sýrkovtyń qurmetine merekelik konsert uıymdastyrdyq. Jazasyn óteýshiler men nysan ákimshiliginiń atynan biz aqsaqaldy merekesimen shyn júrekten quttyqtaımyz", - deıdi jazasyn óteýshilerdiń biri Vıtalıı Volkov.

Arnaıy ardagerdiń qurmetine soǵys ýaqytyndaǵy ánder oryndalyp, óleńder oqylyp, konsert uıymdastyryldy.

Ivan Sýrkov búginde jazasyn ótep, bostandyqqa shyǵýdy armandaıdy. Al jaza óteýshiler uıymdastyrǵan konsert onyń kózine eriksiz jas úıirdi.

Aýdarǵan: Ádilet Mádenıet