Jasym kelgen saıyn qyryqtan asqan áıelderge degen qurmetim ósip keledi. Onyń sebebi kóp.

Mysaly, qyryqtan asqan áıel eshqashan seni tún jarymynda oıatyp, «Ne oılap jatyrsyń?» dep suramaıdy. Onyń seniń ne oılaıtynyńa túkirgeni bar. 

Eger qyryqtan asqan áıelge senimen birge otyryp teledıdar kórý qıyn bolsa, sol úshin shashyn julyp, baıbalam salmaıdy. Seniń janyńda ýaqyt jolǵatqansha, ózine unaǵan ispen aınalysady. Jáne kóbinese ol aınalysqan is – seniń teledıdaryńnan áldeqaıda paıdaly ári qyzyqty bolyp shyǵady.

Qyryqtan asqan áıel ózin óte jaqsy biledi. Ózine bek senimdi. Kim bolǵysy, ne jasaǵysy keletinin de anyq biledi. Kimnen ne qalaıtynyn da naqty biledi. Mundaı jastaǵy áıelderdiń kóbisin seniń ol týraly, ne ol istep jatqan is jóninde pikiriń qyzyqtyrmaıdy.

Qyryqtan asqan áıelder óte namysshyl. Meıramhanada, ne operada otyrǵanda saǵan maıdan ashyp, urys-keris shyǵarmaıdy. Árıne, eger óziń kináli bolyp tursań, ol jazalanbaıtynyna anyq kózi jetse, eshkim kórmeıtin jerde atyp kete alady.

Qyryqtan asqan áıelder maqtaý sózge jomart keledi. Kóbine laıyqsyz maqtaı beredi. Sebebi, olar jaqsylyqty qadirlemeýdiń ne ekenin jaqsy biledi.

Qyryqtan asqan áıelder seni qurbylarymen tez tanystyrady. Óıtkeni, ózine senimdi. Jas qyzdar serigin qurbylaryna tanystyrýǵa asyqpaıdy. Sebebi, serigine senimi bolmaıdy.

Qyryqtan asqan áıelge sen onyń qurbylaryn sulý dep maqtasań da báribir. Ol qurbylary eshqashan satyp ketpeıtinin jaqsy biledi. 

Qyryqtan asqan áıelderdiń túısigi ótkir. Onyń aldynda syltaý aıtyp dilmársýdyń qajeti joq. Olar onsyz da sen týraly bárin biledi.

Qyryqtan asqan áıelderge qyp-qyzyl pomada keremet jarasady. Jastar týraly olaı deı almaımyz. Kóziniń aınalasyndaǵy birdi-ekili ájimin baıqamaýǵa tyryssań, qyryqtan asqan áıelder jas qyzǵa qaraǵanda áldeqaıda shyraıly, tartymdy, baýrap alatyn bir qudireti bolady. 

Qyryqtan asqan áıelder únemi ashyq, jalǵan sóılemeıdi. Eger sen naqurys bolsań, ózińdi mal sıaqty ustasań, onyńdy birden betińe aıtady. Ol sen týraly ne oılap qaldy eken dep eshqashan qınalmaısyń. Sondyqtan qyryqtan asqan áıelderdi qurmetteýdiń sebebi kóp. 

Ókinishke oraı, qyryqtan asqan erkekter týraly dáp osylaı aıta almaısyń. Árbir súıkimdi, kelisti, ajarly, aqyldy, jaqsy kútinetin qyryqtan asqan áıelge - qarny qampıǵan, tizesi shyǵyp ketken shalbar kıip, jıyrma jasar daıashy qyzdyń kózinshe ózin esersoq qyp kórsetetin qyryqtan asqan erkek bar. 

Hanymdar, sizderden keshirim suraımyn. «Sıyrdy tutas satyp alyp ne kerek, sútti tegin ala alsań» deıtin kókezý erkekter úshin mende bir jańalyq bar. Búgingi tańda áıelderdiń 80 paıyzy neke qurýǵa qulyqty emes. Nege? Sebebi, bir shujyq úshin bútin shoshqany satyp alýdyń mánisi ketken. 

Endı Rýnı
Aýdarǵan: Shynar Ábildá

Usynǵan: Maqpal Sembaı