Buryn bul jerde baı flora men faýnasy bar tropıkalyq orman bolady, biraq adamdar aǵashtyń bárin shaýyp alǵan soń joıylyp ketken. Tropıkalyq orman ólip, topyraq qunarsyzdanyp, jansyz shólge aınaldy. Brazılıalyq otbasylyq jup 20 jyldyń ishinde ormandy qaıta qalpyna keltirdi dep jazady Qamshy.kz aqparat agenttigi.

Brazılıalyq fotojýrnalıst Sebastán Salgado óte ádemi tabıǵat aıasynda, tropıkalyq ormanda dúnıege kelip, er jetedi. Týǵan jerinen jyraqqa ketip, kóp jyldan keıin oralǵan Sebastán jaıqalǵan tabıǵattyń ornynda qalǵan qańyraǵan dalany kórip qatty qynjylady. 

Sebastán Salgado tabıǵatty burynǵy qalpyna keltirip, adamdardyń keltirgen zalalyn túzetýge sheshim qabyldady. Áıeli Lelıa Delýıs Vanık Salgado Sebastánǵa batyl oı tastap, ormandy qaıtadan otyrǵyzýdy usynady. Osylaı otbasyly jup Instituto Terra (Earth Institute) atty uıym qurǵan.

1999 jyldyń jeltoqsanynda uıym alǵashqy tuqymdardy otyrǵyza bastaǵan, bul keremet transformasıanyń basy boldy. Olar aǵashtyń 300-den  astam túrin otyrǵyzyp, osy jerdiń florasy men faýnasyn qalpyna keltirdi.

Fotosýretterden tabıǵattyń qalaı qalpyna kelip, ómirge qaıta oralǵanyn anyq baıqaısyz.

Topyraq erozıasy rettelgen soń, sý resýrstary qalpyna kelgen. Kesýden keıin joıylǵan tabıǵı kózder qaıtaryldy. Eń mańyzdysy, janýarlardyń ormanǵa qaıta oralýy boldy. Jańa ormanda qustyń 172 túri, sútqorektiń 33 túri, baýyrymen jorǵalaýshylardyń 15 túri jáne amfıbıanyń 15 túri paıda boldy. Sonyń ishinde búkil dúnıe júzinde joıylyp ketý qaýpi tóngen túrleri de bar.

Qazirgi tańda Mınas -Jeraıs tropıkalyq jumaqqa aınalǵan. Ormanda kóptegen ósimdikter men janýarlar ómir súredi.

20 jyldyń ishinde joǵalǵan jerdiń túpnusqalyq pishini qaıtaryldy. Al ómirsiz shól dala tek eski fotosýretterde qaldy. Instituto Terra uıymy adamnyń  tabıǵatty joıyp qana qoımaı, qorshaǵan ortany qalpyna keltire alatynyn kórsetti. Jerdi qalpyna keltirgennen keıin jer ınstıtýty óziniń jumysyn toqtatpaı, ekologıany qorǵaý jáne planetamyzdy saqtaý ıdeıasyn damytýdy jalǵastyryp keledi.