QR Premer-Mınıstri Asqar Mamın jumys saparymen Shyǵys Qazaqstan, Almaty jáne Qaraǵandy oblystaryna jumys saparymen bardy dep jazady Qamshy.kz aqparat agenttigi Qazaqstan Respýblıkasy Premer Mınıstriniń Resmı saıtyna silteme jasap.
Asqar Mamın el óńirlerine saparlary kezinde berilgen Memleket basshysy Qasym-Jomart Toqaevtyń tapsyrmalarynyń iske asyrylý barysyn tekserdi.
Elimizdiń ornyqty kólik ınfraqurylymyn damytý maqsatynda QR Tuńǵysh Prezıdenti – Elbasy Nursultan Nazarbaev bastamashy bolǵan "Nurly jol" memlekettik baǵdarlamasynyń oryndalý barysyna basa kóńil bólindi.
Shyǵys Qazaqstan oblysynda Asqar Mamın "Óskemen – Taldyqorǵan" avtojolyn salý jobasyn iske asyrý barysyn qarady. Bıyl 265 shaqyrym jolda qozǵalysty ashý kózdelgen. Jalpy, uzyndyǵy 763 shaqyrym bolatyn jol 2020 jyly paıdalanýǵa tolyqtaı beriledi. Bunymen qosa, "Qalbataý – Maıqapshaǵaı" trassasynda rekonstrýksıalaý jumystary júrgizilip jatyr, onda jyl sońyna qaraı 135 shaqyrym avtojol paıdalanýǵa beriledi.
Almaty oblysynda QR Úkimetiniń basshysyna uzyndyǵy 355 shaqyrymdaı bolatyn "Óskemen – Taldyqorǵan" avtojolynyń shyǵys bóligin rekonstrýksıalaý, uzyndyǵy 184 shaqyrym bolatyn "Úsharal – Dostyq" avtojolyn salý jobasy týraly baıandaldy.
Asqar Mamın Aqshy aýylyndaǵy Alakól kóliniń qorshaýshy bógetiniń qurylys ornyn tekserdi. Nysan jaǵalaýǵa jaqyn ornalasqan aýyldardyń 2,5 myńnan astam turǵynyn tolqyndardyń saldarynan qorǵaýǵa múmkindik beredi.
Sondaı-aq, Premer-Mınıstr Alakól kóliniń jaǵalaýyndaǵy demalys aımaǵyn abattandyrý jumystarymen tanysty. Óńirde 200-den astam týrısik nysan iske qosylǵan, 450 orynǵa arnalǵan "QOQTEM GRAND RESORT" jańa qonaq úı kesheni paıdalanýǵa berilýde. Bıyl jańa qonaq úıler, servıs nysandaryn salý arqyly týrısik áleýetti damytý sharalary jalǵastyrylady. Bıyl Alakól kóliniń ońtústik jaǵalaýyna 1,3 mln týrıs keledi dep boljanǵan.
Qaraǵandy oblysynda "Qaraǵandy – Balqash" avtojolynyń ýchaskesindegi jumys tekserildi. Atalǵan joba boıynsha bıyl 187 shaqyrymda jol qozǵalysy ashylady. Nysandy tolyq paıdalanýǵa berý 2020 jylǵa josparlanǵan. "Qaraǵandy – Temirtaý" jáne "Qaraǵandy q. aınalma joly" jobalary boıynsha jumystar jyl sońyna deıin 61 shaqyrym joldy paıdalanýǵa berýmen aıaqtalady.
QR Premer-Mınıstri Asqar Mamın Shyǵys Qazaqstan oblysy joldarynyń ýchaskelerindegi qurylystyń joǵary qarqynmen júrip jatqanyn atap ótip, Almaty jáne Qaraǵandy oblystarynyń nysandary boıynsha qurylys jumystarynyń ekpinin kúsheıtýdi tapsyrdy. Qarqyndy jumys rejımi men jedeldetilgen jumyldyrý úshin jobalar qurylysynyń merzimderine tıisti túzetýler engizý qajet. Úkimet basshysy jergilikti turǵyndardy obektilerdi iske asyrýǵa tartýdyń, eńbekaqy tóleýdiń qajetti jaǵdaılaryn qamtamasyz etýdiń jáne qazaqstandyq qamtý úlesin arttyrýdyń mańyzdylyǵyn atap ótti.
"Infraqurylym jumys isteýi kerek. "Óskemen – Taldyqorǵan" jáne "Qaraǵandy – Almaty" jobalary boıynsha mindet – 2020 jyly joldaǵy qozǵalysty ashý. Sapa máselesi negizgi basymdyqta bolýy qajet», — dedi A. Mamın. — Alakól kólinde týrısik áleýetti damytý jumystaryn jalǵastyrý qajet. Bıyl shyǵys jáne ońtústik jaǵalaýlarǵa 2 mln-ǵa jýyq týrıs keledi".
Usynǵan: Marjan Sábet
