Jastar jylyna oraı Jambyl oblysy ákimdigi bilim basqarmasynyń «Ǵylymı-tájirıbelik dene shynyqtyrý ortalyǵynyń» uıymdastyrýymen «Oqýshy Arlany» týrnıri ótip, oǵan Taraz qalasy men aýdandardan barlyǵy 87 balýan qatysty.
Jalpy, mektep oqýshylary arasynda uıymdastyrylyp otyrǵan tuńǵysh týrnır 60 keliden joǵary absolúttik salmaq dárejesinde jáne olımpıadalyq júıe boıynsha ótti. Bul kúni balǵyn balýandardyń ónerin tamashalaýǵa «Tórtkúl» kerýen saraıyna jıylǵandardyń qarasy qalyń boldy. Jankúıerlerdiń qoldaýyn aıqyn sezingendikten de bolar, jetkinshekter aıanyp qalǵan joq. Bapkerleriniń artqan senimin aqtaý úshin, bar ónerlerin salyp baqty. Osy oraıda jas tolqynnyń qazaq kúresine shyndap den qoıyp, ártúrli aıla-tásilderdi jetik meńgergendigi kópshilikti súısintti.
Árıne, sporttyń aty-sport. Munda baǵy men baby keliskender top jarady. Degenmen, júldeni ońaıshylyqpen bere salý taǵy bolmaıdy. Sondyqtan da salamatty ómir saltyn serik etip, sportqa shyndap den qoıǵan jastar qarsylastaryn qapy qaldyrýǵa tyrysty. Bul jolǵy básekede Jambyl aýdany, Besaǵash aýyly, Abaı atyndaǵy orta mekteptiń 11-synyp oqýshysy Nurlan Qyrǵyzbek eshkimge des bermeı, «Oqýshy Arlany» atandy. Al aqtyq aınalymda sál sáttilik jetispegen oblystyq sporttaǵy daryndy balalarǵa arnalǵan mektep-ınternatynyń 11-synyp oqýshysy Baqdáýlet Erkinbekuly ekinshi orynnan kórindi. Úzdik úshtikti Jambyl aýdany, Asa aýyly, Iý.Gagarın atyndaǵy orta mekteptiń 11-synyp oqýshysy Jantóre Jumabaı túıindedi.
Jarys jeńimpazdary men júldegerlerine M.H.Dýlatı atyndaǵy Taraz memlekettik ýnıversıtetiniń rektory Mahmetǵalı Sarybekov bir jyldyq oqý aqysyna 50 men 100 paıyz aralyǵynda jeńildik taǵaıyndasa, Taraz ınovasıalyq-gýmanıtarlyq ýnıversıtetiniń rektory Erbolat Saýryqov birinshi orynǵa – 150 myń, ekinshi orynǵa – 100 myń jáne úshinshi orynǵa – 50 myń teńge kóleminde syıaqy berdi. Budan bólek, týnır jeńimpazyna qas sheberler qolynan shyqqan «Oqýshy Arlany» týrnıriniń logotıpi beınelengen belbeý tabys etildi.
Endi jeńimpazdar men júldegerler aǵymdaǵy jyldyń 25-26 mamyr kúnderi Almaty qalasynda ótetin «Halyq barysy» respýblıkalyq alamanynda óńir namysyn qorǵaıtyn bolady.
Bul, árıne, sportshy jastarǵa jasalǵan úlken qamqorlyq. Osylaı qanattanǵan órender bolashaqta álemdik dodalarda atoı salyp, elimizdiń kókbaıraǵyn bıikte jelbiretetindigine senim mol.
Baqyt Jalǵas
