Elordada otyzǵa jýyq otbasy dalada qalaıyn dep tur. Óıtkeni satyp alǵan úıleri ekinshi ret zańsyz saýdalanǵan kórinedi. Endi úıdi satyp alǵan eki tarap bir-birimen sottasyp júr. Olardy osylaı daýlastyryp qoıǵan qurylys kompanıasynyń basshylary bolsa túrmede otyr dep habarlaıdy Qamshy.kz aqparat agenttigi kaz.tengrinews.kz saıtyna silteme jasap.
40 jyl muǵalim bolyp, zeınetke shyqqan Roza apaı Tarazdaǵy búkil dúnıe-múlkin satyp, elordaǵa ulynyń qolyna kóship kelgen. Myna úsh bólmeli páterdi 2016 jyldyń basynda tolyq bitpegen kúıinde satyp alyp, ishin túgel ózderi jasatqan. Jalpy shyǵyny 20 mıllıonnan asty deıdi. Úıdegi 7 adam endi rahatyn kóre bastaǵanda saý etip bireý sýyt habar ákepti.
"Notarıýs bul úıdiń buǵan deıin satylǵan satylmaǵanyn, kepildikte turǵan turmaǵanyn tekserdik. Búkil jerden anyqtamasyn aldy. Notarıýs sodan keıin bizben kelisimshart jasady. Úıdiń birin rettep qajetti dúnıe-múlikti oryn-ornyna qoıyp otyrsaq, bir kúni "úı meniki" dep bir áıel kelip tur", - dediNur-Sultan qalasynyń turǵyny Roza Baıdýanova.
Kelip turǵan kisiniń qolynda 2012 jyldan beri sol páterdiń ıesi ekenin rastaıtyn qujaty bar eken. Roza apaı sekildi opyq jep qalǵan "Anısa" turǵyn úı kesheni turǵyndarynyń sany ózderiniń aıtýynsha, 29. Bári de bir-bir qushaq qujat ustap alyp, páterdiń shyn qojaıyny ekenin dáleldeı almaı júr.
"Onyń kelisimshartynyń birinshi paraǵy jańartylǵan. Keshirińizder, páterdiń qujatynyń birinshi betin jyrtyp alǵan. Onyń ústine olar 2012 jyly satyp alǵan páterlerin. Sonda 2016 jylǵa deıin qaıda júrgen", - deıdi Nur-Sultan qalasynyń turǵyny Yrysty Estıar.
Olardy sońǵy 3-4 jyl qatarynan ábigerge salyp otyrǵan myna top. Olardyń aıtýynsha, úı jarna retinde osy kisilerdiń aqshasyna salynǵan. Bulardyń da qoldarynda rastaıtyn qujattary jetkilikti. Úıine tólegen mıllıondary túbirtek kúıinde áli saqtaýly. Tek úı bitýge shaq qalǵanda qurylys salýshy basshylar birneshe páterdi basqa bireýlerge satyp jibergen. Sondyqtan kináni bizden emes, qurylysshylardan izdeý kerek deıdi.
"Bizben soǵysqa shyqqan sıaqty. Prokýratýraǵa baryp qaıta-qaıta meniń ústimnen is qozǵasyn degen ótinishter jazyp jatyr. Bunyń barlyǵy adamdy qajytady, sharshatady. Olardyń jaýy men emes qoı. Men emes olardyń páterin ekinshi ret satqan", - deıdi Nur-Sultan qalasynyń turǵyny Ásel Álıeva.
Olar on adam birigip alyp, bir advokat jaldaǵan. Jalpy úı birinshi qojaıyndardyń jarna retinde jınaǵan aqshasyna salynǵan, ony rastaıtyn qujattary bar deıdi advokaty. Qurylystyń mundaı túri zańda ruqsat etilgen.
"Mámilelerdi kez kelgen ýaqytta jasaýǵa bolady. Ol úıdi salýǵa ruqsat oǵan qajet emes. Jer bóliný qajet emes. Óıtkeni, zań boıynsha mundaı mámileler jasalyp, aqsha jınalady. Jerdi satyp alyp úıdi salýǵa qarajat jınaý úshin zań boıynsha ruqsat etilgen", - deıdi zańger Aıman Jumabekova.
Osyǵan deıin ótken 3-4 sot sheshimi úıdi 2012-2013 jyldary satyp alǵandardyń paıdasyna sheshilgen. Al páterinen aırylǵysy kelmegen ekinshi top endi joǵarǵy sotqa barmaq.
Jalpy, "Anısa-1" - qaladaǵy problemalyq turǵyn úı keshenderiniń qataryna jatady. Sottasyp jatqan eki jaqtyń biri qalaı bolǵan kúnde mıllıondaǵan aqshaǵa satyp alǵan páterinen aırylǵaly tur. Dalada qalsa salǵan aqshasy da kózden bulbul ushady. Óıtkeni, olardy qyrqystyryp qoıǵan qurylys kompanıasy basshylary 6-8 jylǵa sottalyp ketken.
Usynǵan: Dáýren Sybanbaı
