Ózbekstanda álemdik halal standartyna saı alǵashqy meımanhana Sahid Imam Al-Buhari qonaq úıiniń irgetasy saltanatty túrde qalandy dep habarlaıdy Qamshy.kz aqparat agenttigi ummet.kz saıtyna silteme jasap.

Ózbekstannyń Samarqand qalasynda ótken ashylý saltanatyna ındonezıalyq Sahid Group kompanıasynyń prezıdenti jáne basqarý dırektory Vıvı Herlambang qatysty. Imam ál-Buharı kompleksiniń aıasynda salynatyn qonaq úıdiń qurylysyn Sahid Group jáne SAG kompanıasy birlese júrgizedi dep jazady Ózbekstan memlekettik týrızm komıtetiniń baspasóz qyzmeti.

Qonaq úıin bastapqyda 100 nómirmen ashyp, aldaǵy 5 jylda bólmeler sanyn 300-ge deıin jetkizý josparlanyp otyr. Halal standartynyń talaptaryna sáıkes ár bólmede qubylanyń baǵyty kórsetilip, jaınamaz ben Quran qoıylady. Sondaı-aq halal as máziri jasalyp, Ramazan aıynda sáresi jáne aýyzashar  mezgilderinde arnaıy taǵamdar daıyndalady.  

Aıta keteıik, sáýir aıynda Ózbekstanda qonaq úılerdiń sapasy men qyzmetin damytý maqsatynda meımanhanalar Asosıasıasy qurylǵan edi. Qazir Ózbekstanda ınvestorlarǵa, sonyń ishinde qonaq úıler qurylysynyń ınvestorlaryna qolaıly jaǵdaılar jasalýda. 

Usynǵan: Maqpal Sembaı