Mańǵystaý oblysynda 1 mamyr – Birlik kúni keń aýqymda atalyp ótti. Merekelik shara 5000 adamnan turatyn eńbek ujymdarynyń sherýinen bastaldy. El birligin naǵaıtýǵa baǵyttalǵan sherýge ár salanyń qoǵam belsendileri, Qazaqstan Halqy Assambleıasynyń ókilderi, ulttyq-mádenı birlestik músheleri, jastar, munaıshylar, energetıkter, turǵyn úı-kommýnaldyq sharýashylyq qyzmetkerleri, dárigerler men muǵalimder, shaǵyn jáne orta bıznes sýbektileri, qarjygerler, sportshylar men ónerpazdar atsalysty. 

Qoldaryna yntymaq pen berekeni ulyqtaıtyn qanatty sózder jazylǵan transparanttar men jalaýshalar bar qyzmetker, túrli-tústi sharlarmen bezendirilgen arnaıy tehnıkalar merekelik sherýdi kórkeıte tústi. 

Sherý aıaqtalysymen bas sahna-amfıteatrda «Ult birligi – uly baılyq» atty ólke shyǵarmashylyq ujymdarynyń merekelik konsertine ulasty. Konsertpen qatar alańnyń basqa bólikterinde túrli sporttyq sharalar, ulttyq taǵamdar men qoldanbaly qolóner buıymdarynyń kórmesi, qala kásipkerleriniń merekelik jármeńkesi júrip jatty. 
Atalǵan sharaǵa Mańǵystaý oblysynyń ákimi turǵyndardy birlik kúnimen quttyqtady.

«Bul kún birlik, tatýlyq kúni, árqaısysymyz úshin erekshe qymbat meıram. 1 mamyr – bizdiń mıllıondaǵan otandastarymyzdyń júreginen aıryqsha oryn tapqan, rýhanı dástúrge aınalǵan aıtýly kún. Eldigimiz ben egemendigimizdiń dińgegi, tatýlyǵymyz ben dostyǵymyzdyń uıytqysy, Otanymyzdyń tiregi bolyp otyrǵan osy – birlik pen yntymaq, aǵaıyn! Birlik pen yntymaqtyń almaıtyn qamaly, shyqpaıtyn shyńy, aspaıtyn asýy joq. Qazaqstannyń Tuńǵysh Prezıdenti – Elbasy Nursultan Nazarbaev «Bizdiń tiregimiz - Táýelsizdik, tilegimiz - Turaqtylyq, bilegimiz - Birlik!», -degen bolatyn. Rasymen de, táýelsizdik, turaqtylyq pen birlikten asqan qundylyq joq. Bizdiń kópultty elimiz ben kópetnosty qoǵamymyzdy «Máńgilik El» jalpyulttyq ıdeıasy aıasynda jumyldyrýda, týǵan jerge degen patrıotızm, senim, dostyq qundylyqtarynyń ornyǵýynda Qazaqstan halqy Assambleıasy ınstıtýtynyń mańyzy zor. Assambleıa – Táýelsizdiktiń jemisi. Assambleıa kez kelgen syn-qater tóngen kezde jáne Táýelsizdiktiń barlyq kezeńinde árdaıym bıikten kórine bildi. Onyń tarıhynda bizdiń ulttyń órleý dáýiriniń kezeńderi men naqty nátıjeleri kórinis taýyp keledi», - dedi oblys ákimi.

Sóz sońynda óńir basshysy aıtýly kúnde mańǵystaýlyqtar men qala qonaqtaryna denderine saýlyq, otbasylaryna baqyt jáne merekelik kóńil kúı tiledi.