QR Tuńǵysh Prezıdenti N.Á.Nazarbaev usynǵan «100 naqty qadam» Ult josparynda zańnyń ústemdigin qamtamasyz etýge basa mán berilgeni belgili. Bul turǵyda sot júıesin odan ári jetildirý boıynsha da naqty mindetter júkteldi.  Aıtý kerek, elimizdiń sot júıesinde júrgizilip jatqan reformalardyń nátıjesinde órkenıeti ozyq elderdiń tájirıbesi qoldanysqa engizlip, sottarǵa tolyqqandy jaǵdaı jasalýmen qatar, kásibı sot júıesin damytý, olardyń qoǵam aldynda ashyqtyǵy men qoljetimdiligi qamtamasyz etý qolǵa alyndy. Azamattardyń quqyqtary men bostandyqtaryna zańmen kepildik berilip, sottyń táýelsiz jáne ádil bolýyna jol ashyldy.

Jambyl oblystyq sot ǵımaratynda oblystyq sottyń tóraǵasy Rústem Myrzakárim, oblystyq sot sýdıalary, qalalyq jáne oǵan teńestirilgen sýdıalardyń qatysýymen M.H.Dýlatı tyndaǵy Taraz memlekettik ýnıversıteti zań fakýltetiniń 3-4 kýrs stýdentteri arasynda ótkizilgen dáriste joǵaryda atalǵan, ıaǵnı zańnyń ústemdik qurýyna negiz bolǵan bes ınstıtýttyq reformaǵa qatysty sot júıesindegi jańashyldyqtar áńgimege arqaý boldy. Jalpy, sot qyzmetkerleriniń stýdenttermen kezdesý ótkizip, olarǵa dáris oqýdaǵy basty maqsat – jastarǵa elimizdiń sot júıesine engizilgen reformalardyń qalaı júzege asyrylyp jatqanyn tanystyrý, Elbasy Nursultan Ábishuly Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda atap kórsetilgen sot júıesin odan ári jańǵyrtýdyń iske asyrylýyn túsindirý.

Dáris barysynda Rústem Myrzakárimuly stýdentterdiń nazaryn sot júıesin jańǵyrtýǵa, azamattardyń sot tóreligine qoljetimdiligin qamtamasyz etýge, tatýlastyrý rásiminiń qoldanys aıasyn keńeıtýge, sot isiniń mamandandyrylýy men sıfrlandyrylýyna aýdardy. Sot júıesin jetildirýdiń osy baǵyttary «Sot tóreliginiń jeti tasy» atty basym jobalardyń portfelin júzege asyrý aıasynda jeke pılottyq jobalardy engizý arqyly júzege asyrylyp jatqanyn sóz etti.

Budan keıin sóz alǵan oblystyq sottyń sýdıalary Gúlnar Asylbek pen Dınara Nurlybaeva «Otbasylyq sot» pılottyq jobasyn iske asyrýdaǵy ózekti máselelermen jáne bitimgerlik rásimderdi qoldanýdyń jaı-japsaryn áńgimeledi. «Otbasylyq sot» pılottyq jobasy otbasy qundylyqtaryn saqtaýdy, otbasylyq daýlardy meılinshe tatýlastyrý rásimderin qoldana otyryp bitimgershilikpen sheshýdi, balalardyń tolyqqandy otbasynda tárbıelenýin, meıirimdilik, izgilik sekildi qasıetter otbasynan bastaý alatynyn tilge tıek etti. Stýdentter «Túngi sot» pılottyq jobasynyń  maqsaty men mindetterine Taraz qalalyq mamandandyrylǵan ákimshilik sotynyń tóraǵasy Berik Orazymbetovtyń dárisi arqyly qanyqty. Oblys boıynsha Sottar ákimshisi basshysynyń orynbasary Gýzal Turdyeva, aqparattyq tehnologıalar jáne aqparattyq resýrstardy qorǵaý bóliminiń basshysy Mýhıtdın Raıymbekov sottardaǵy aqparattyq tehnologıalardyń múmkindikteri jaıly aıtyp berdi.

Shara sońynda stýdentterge Taraz qalalyq sotynyń qyzmetkerleri tarapynan qoıylǵan kórnekti sot prosesi kórsetilip, sot zaldaryna ekskýrsıa jasaldy.  

Baqyt Jalǵas