«Rýhanı jańǵyrý» baǵdarlamasy aıasynda Jambyl oblysynda qaıyrymdylyq sharalaryna da basa mán berilip, turmysy tómen otasylarǵa kómek kórsetilýde. Bul iske jergilikti jerdegi isker azamattar da óz úlesterin qosyp jatyr. Mysaly,  «Ǵylymı-klınıkalyq kardıohırýrgıa  jáne transplantologıa ortalyǵynyń» basshysy Seıithan Joshybaev 7 638  mıllıon teńgege 3 800 turǵyndy tegin dárigerlik tekserýden ótkizse, «Jasulan ı K» jaýapkershiligi shekteýli seriktestiginiń dırektory J. Omarova  az qamtamasyz etilgen bir otbasynyń  balasynyń joǵary oqý oryndaǵy 5 jyldyq oqý aqysyn tólep berdi.

-Bizdiń aramyzda muqtaj jandarǵa qolushyn sozyp, kómek kórsetip turatyn naǵyz azamattardyń bary, árıne, qýantatyny sózsiz. Osyǵan oraı, ıgi isterdiń basynda júrgen azamattar byltyr tamyz aıynda qalalyq mádenıet úıinde «Jomart júrek» syılyǵynyń laýreaty atanyp, saltanatty jaǵdaıda marapataldy.  Osy jıynda «Batyl júrek» atalymyn qalalyq ishki ister departamentiniń jergilikti polısıa qyzmetiniń jol qaýipsizdigi polısıasynyń aǵa leıtenanty Samat Alashev, áleýmettik mańyzy bar, qaıyrymdylyq jobalardy jáne aksıalardy tıimdi júzege asyrǵany úshin, qaıyrymdylyq kómek berýdiń jańa tıimdi túrlerin engizgen, qoǵamdyq mańyzy bar sharalarǵa bas demeýshilik jasaǵan «Múgedek jastar qoǵamy» qoǵamdyq birlestiginiń tóraǵasy Rýslan Tólegenov «Jyldyń úzdik uıymy» atalymyn ıelendi. Belsendi azamattyq ustanymy, ártúrli baǵyttaǵy keń aýqymdy qaıyrymdylyq qyzmetti júzege asyrǵany úshin  «Jyl tulǵasy» atalymynyń syılyǵy «Logıteh» jaýapkershiligi shekteýli seriktestiginiń dırektory Anton Skramovskııge tabystaldy. Ol «Qaýipsiz mektep» pılottyq jobasy boıynsha  A. Pýshkın atyndaǵy № 41 kópsalalyq gımnazıasyna 4 mıllıon 436 myń teńgege  4 týrnıket ornatyp bergen bolatyn,-deıdi Taraz qalasynyń ákimi Qaırat Dosaev.

Byltyr «Dostyq» úıinde Taraz qalasy jáne Túrkistan oblysy kásipkerleriniń qatysýymen «Tarazdyń túrlenýi» atty iskerlik-áriptestik forým ótkeni belgili. Aýqymdy jobalar aıasynda mádenı-iskerlik ortalyq pen «Shahrıstan», «Kóne Taraz», Tekturmas keshenderiniń tanystyrylymy ótti. Sondaı-aq, komersıalyq nysandardyń qurylysyn júrgizýge nıet bildirgen kásipkerler 800 mıllıon teńgege  memorandýmyna qol qoıdy.

Baqyt Jalǵas