15 maýsymda Tájikstan astanasy Dýshanbede Azıadaǵy ózara yqpaldastyq jáne senim sharalary jónindegi keńestiń (AÓSSHK) V samıti  ótti. Oǵan  Qazaqstan prezıdenti Qasym-Jomart Toqaev ta qatysty dep jazady Qamshy.kz aqparat agenttigi Aqordaǵa silteme jasap.

Samıtke Toqaevtan bólek, Vladımır Pýtın, Sı Szınpın, Hasan Rýhanı, Shavkat Mırzıaev, Abdýlla Abdýlla jáne basqa da 27 eldiń basshylary qatysqan. Tájikstan astanasynda osyndaı ókildik delegasıa alǵash ret jınaldy. Sondyqtan bolar samıt óterden bir kún buryn, ıaǵnı,14 maýsymda  Tájikstan prezıdenti Emomalı Rahmon qatysýshylar úshin "Dostyq keshin" uıymdastyrdy. Dýshanbe mańyndaǵy Varzob shatqalynda ornalasqan el rezıdensıasynda samıtke jınalǵan memleketterdiń prezıdentterin qabyldaý ótti.  

Reseılik jýrnalıs Dmıtrıı Smırnov óziniń Twitter paraqshasynda Tájikstan prezıdenti Emomalı Rahmonnyń  Reseı prezıdenti Vladımır Pýtındi qushaqtaǵan sátin "Pýtın men Rahmon Dýshanbede: prezıdenttik deńgeıdegi qushaqtasýlar" dep jazǵan. 

Al Qazaqstandaǵy áleýmettik jelilerde el prezıdenti Qasym-Jomart Toqaevtyń prezıdentter basqosýynda toptan tysqary júrgen sýreti qyzý talqylandy. Feısbýk qoldanýshylary Toqaevty Qazaqstannyń eks-prezıdenti Nursultan Nazarbaev sıaqty "prezıdentter basqosýynda toptyń ortasynda júrip, kópshiliktiń nazaryna túse almady" dep synap jatyr.

Aqordanyń jazýynsha, Toqaev Tájikstanǵa barǵan saparynda birneshe eldiń basshylarymen kezdesti. Olardyń qatarynda Katar Ámiri Tamım ben Hamad Ál Tanı,Tájikstan prezıdenti Emomalı Rahmon jáne Túrkıa prezıdenti Rejep Taıyp Erdoǵan bar.

Toqaev óz baıandamasynda Emomalı Rahmonǵa qonaqjaılylyǵy, Samıtti joǵary deńgeıde uıymdastyrǵany jáne prezıdent bolyp saılanýymen quttyqtaǵany úshin rızashylyq bildirdi. Sonymen qatar, ol Tájikstannyń Azıadaǵy ózara is-qımyl jáne senim sharalary jónindegi keńeske tóraǵalyǵy Keńesti Azıa aımaǵyndaǵy óte mańyzdy máselelerdi sheshý isine belsendi jumyldyrýǵa septigin tıgizetinin aıtty.

Toqaev 1992 jyly BUU-da Qazaqstannyń alǵashqy prezıdenti Nursultan Nazarbaevtyń Azıadaǵy ózara is-qımyl jáne senim sharalary jóninde keńes ótkizý jónindegi usynǵan ıdeıasy Azıa qurlyǵynyń tarıhynda jańa kezeńge jol ashqanyn aıtty.

"Búginde Azıadaǵy ózara is-qımyl jáne senim sharalary jónindegi keńes – Azıa óńirindegi 35 memleketti jáne jer sharyndaǵy halyqtyń jartysyna jýyǵyn biriktirip otyrǵan tıimdi kópqyrly qurylym", – dedi Qasym-Jomart Toqaev.

Qazaqstan prezıdenti qaqtyǵystardyń órshı túskenin, qaýipsizdik mehanızmderiniń erozıasyn, saýda jáne sanksıalyq soǵystardy, sondaı-aq, halyqaralyq terorızmniń beleń alǵanyn atap ótip, óńirdegi qaýipsizdikke tóngen qaterdiń, ıdeologıalyq, etnıkalyq jáne dinaralyq qaıshylyqtardyń órship kele jatqanyna alańdaıtynyn aıtty. Osyǵan oraı, ol Azıadaǵy qaýipsizdiktiń túıtkildi máselelerin sheshý úshin júıeli ári keshendi ádisterdiń qajet ekenine toqtalyp, atalǵan problemaǵa baılanysty Qazaqstannyń ustanymyn jetkizdi.

"Barsha dostarymyz ben seriktesterimizdi Forýmnyń tıimdiligi men halyqaralyq básekege qabilettiligin arttyrý úshin kúsh-jiger jumyldyrýǵa shaqyramyz. Tolyqqandy óńirlik uıym bolý úshin bizge keńesti ret-retimen, birtindep transformasıalaý qajet. Azıadaǵy ózara is-qımyl jáne senim sharalary jónindegi keńesti ınstıtýsıonaldy túrde qalyptastyrý úshin barlyq jaǵdaı jasalǵan, quqyqtyq bazasy ázirlengen, onyń turaqty qurylymdary jumys istep jatyr", – dedi Toqaev.