QR Memlekettik qyzmet isteri agenttiginiń Mańǵystaý oblysy boıynsha departamentiniń uıymdastyrýymen 23 maýsym – Memlekettik qyzmetshiler kúnine oraı, sonymen qatar «Mańǵystaýdyń 1000 jyldyǵy», «Rýhanı jańǵyrý» baǵdarlamasy aıasynda ólkemizdiń kıeli jerlerine oblystaǵy 100-ge jýyq memlekettik qyzmetshiler jáne tarıhshy-mamandar saıahatqa shyqty. Saıahat Aqtaý qalasynan bastaý alyp, Sherqala, Aqmysh, Qyzylqala, Etnoaýyl jáne Aıraqty baǵyttary boıynsha jalǵasyn tapty.
Bıyl Mańǵystaý ataýynyń tarıh betinde paıda bolǵanyna — myń jyl tolyp otyr. Mańǵystaý jeri – bul ejelgi órkenıet eli, 11 myń tarıhı eskertkish memlekettiń qorǵaýyna alynǵan arheologıalyq qoryq, ashyq aspan astyndaǵy murajaı, myńdaǵan tasqa salynǵan sýret-dastandardyń eli. Erekshe dinı ǵımarattar men Beket Ata, Shaqpaq Ata, Shopan Ata, Masat Ata meshitteriniń ólkesi, olarǵa tek Qazaqstannan ǵana emes, álemniń túkpir-túkpirinen de kelýshiler de az emes.
QR Memlekettik qyzmet isteri agenttiginiń Mańǵystaý oblysy boıynsha departamentiniń basshysy Nurgúl Jannazarova memlekettik qyzmetshilerdiń kásibı merekelerin meıramhanalarda nemese basqa da kóńil kóterý oryndarynda emes, ujymmen birge tabıǵat aıasynda tárbıelik mańyzy bar sharalar arqyly atap ótýdiń anaǵurlym tıimdi ekendigin jetkizdi.
Búginde Mańǵystaýdy qazynaly túbek, tarıhı eskertkishter men myńdaǵan joldar ólkesi dep ataıdy. Osyǵan oraı, uıymdastyrylǵan saıahattyń da maqsaty osy myńjyldyqtyń aıasynda, qazynaly túbektiń, tarıhy tereń mańǵaz meken Mańǵystaýdyń kóztartar jerlerin tanytý.
Júzge jýyq jolaýshylar jol boıy kóterińki kóńil-kúımen óz ónerlerin ortaǵa salyp, arnaıy shaqyrylǵan tarıhshy mamandar Quralaı İzimbergenova men Lúdmıla Korovınanyń súıemeldeýiniń arqasynda ólkemizdiń tarıhy týraly áńgimelermen sýsyndap, kókeıindegi saýaldaryna tushshymdy jaýaptar aldy.
Etnosaıahattyń alǵashqy aıaldamasy Mańǵystaý aýdanynda ornalasqan Sherqala taýy boldy. Ańyzǵa bólengen Sherqala taýy Mańǵystaý oblysynyń tabıǵı rámizi ispettes. Belgili bir bıiktikten qaraǵanda, ol Aqmyshtyń jer qabattary arasyndaǵy ertegidegi dáý-kóshpeliler turǵyzǵan alyp kıiz úıge uqsaıdy. Sherqala jaıyndaǵy ańyzdardyń birinde, erterekte qaptaǵan jaýlardan bir top aıbyndy jaýyngerler taýdy qorǵan etken delinedi. Olar jaýmen jolbarystar sıaqty alysypty. Taýdy qorǵaýshylardyń qalǵany taý ishindegi jerasty joldaryna tyǵylyp, sol jerde máńgi qalyp qoıypty. Erlik pen erkindiktiń óteýi - Jolbarys qala nemese Sherqala degen ataý osydan kelip shyqqan.
Sherqala taýynyń eteginde mańǵystaýlyq memlekettik qyzmetshiler Shyǵys Qazaqstan oblysyndaǵy áriptesterine «Týǵan jerdi tanı bil» atty chellendjdi joldap, etnotýr estafetasyn jalǵastyrýǵa úndedi.
Budan soń memlekettik qyzmetshiler Aqmysh shatqalyna at basyn tiredi. Aqtaý qalasynan 170 shaqyrym jerdegi Shetpe kentine jaqyn ornalasqan Aqmysh bul ári ásem tabıǵat ta, ári sonshalyqty qyzyq tarıhy da deýge bolady. Shaǵyn orman (toǵaı), syńǵyrlaǵan bulaqtar, jartas jasalymdarynyń tań qalarlyq pishinderi aıasynda zerek saıahatshy orta ǵasyrlar dáýirine jatatyn tarıhı oqıǵalardyń izderin kórýi múmkin.
Etnosaıahatqa erekshe tereń maǵyna bergen tarıhı keshen – ortaǵasyrlyq Qyzylqala qalasy.
Qazirgi tańda Mańǵystaý oblysy aımaǵynda tórt orta ǵasyrlyq eldi mekenderdiń qaldyqtary belgili. Solardyń biri-Mańǵystaý aýdany aýmaǵyndaǵy Aqmysh bulaǵy jaǵasynda ornalasqan Qyzylqala qalashyǵy 10 ǵasyrdyń ekinshi jartysy-13 ǵasyrdyń basy kezeńderindegi neǵurlym mańyzdy eskertkish bolyp tabylady. Mamandardyń aıtýynsha, erte orta ǵasyrlarda Mańǵystaý oblysy aımaǵynan belgili Uly jibek joly degen kontınent aralyq saýda joldarynyń soltústik tarmaqtary ótken. Mańǵyshlaq túbeginiń aımaǵy qurlyq jáne teńiz saýda qatynastarynyń tamasha ushtasqan saýda joldarynyń tranzıttik bóliginiń biri retinde mańyzdy ról atqardy. Saýdanyń damýy munda alǵashqy otyryqshy eldi mekender men qalalardyń, al Kaspıı teńiziniń jaǵalaý alqaptarynda-portty qystaýlardyń paıda bolýyna sebebin tıgizdi. Teńizdegi saýda barlyq kaspıı mańy memleketterin biriktirdi.
Bul arheologıalyq nysannyń shaǵyn ǵana bóligine aldyn-ala júrgizilgen qazba jumystarynyń qorytyndysy Qyzylqala - iri saýda-qolóner qalasynyń qaldyqtary bolyp tabylady dep boljaýǵa múmkindik beredi. Bul jerden tabylǵan qysh ydystarynyń synyqtary boıynsha joramaldasaq, qalashyq qurylysy 10-11 ǵǵ. kezeńderinde bastalǵan, al qaınaǵan ómir 13 ǵ. ekinshi jartysynda Altyn Ordanyń saýda baılanystary jandanýy bastalǵanǵa deıin toqtaǵan.
Tarıhshy mamandardyń aıtýynsha, Qyzylqala kerýen saraıyn UNESCO deńgeıinde qorǵaýǵa alýǵa tolyq múmkindikter bar.
Etnosaıahattyń kelesi bir aıaldamasy «Kógez» etnoaýyly. Joǵaryda atap ótkenimizdeı, Mańǵystaý - qazynaly túbek, tarıhı eskertkishter men myńdaǵan joldar ólkesi. Osy mádenı muralardy keńinen nasıhattaý úshin aımaqtatutas bir etnoaýyl boı kótergen bolatyn. Etnoaýylǵa kelgen qonaqtar qazaqtyń dástúrimen tanysyp, ulttyq taǵdamdarynan dám tatady, arnaıy týrısik baǵyttar boıynsha óńirdiń tarıhı jáne kórikti jerlerin aralaıdy.
Tarıhı-tanymdyq is-shara Aıraqty taýynyń eteginde aıaqtaldy. Batys Ústirt kemeriniń (shyńynyń) qıyr soltústik-batysynda jáne Óliqoltyq sorynyń túıisken jerinde ornalasqan. Absolútti bıiktigi 148 metr. 1931 jylǵa deıin ózimen attas aılaq jáne eldi meken bolǵan. Qazan tóńkerisine deıin Aıraqtydan Qońyrat qalasyna deıin turaqty saýda kerýeni qatynap turǵan. Qazaqstandaǵy iri as tuzy jáne mırabılıt tuzdarynyń ken orny retinde belgili.
Jalpy alǵanda, 23 maýsym – Memlekettik qyzmetshiler kúni, Mańǵystaýdyń 1000 jyldyǵy men «Rýhanı jańǵyrý» baǵdarlamasy aıasyndaǵy etnosaıahat óz maqsatyna jetti dep esepteımiz. Buǵan saıahat barysynda óńirlik telearnaǵa memlekettik qyzmetshilerdiń bergen tilekteri men oń pikirleri dálel. Respýblıkada alǵashqy bolyp Agenttiktiń aýmaqtyq departamentimen qolǵa alynǵan osyndaı shara ólkemizdiń basqa da aýdandaryndaǵy tarıhı-mádenı jáne kıeli oryndarynda jalǵasyn tabatyn bolady.
QR Memlekettik qyzmet isteri
agenttiginiń Mańǵystaý oblysy
boıynsha departamenti
