Pavlodar men Shymkenttegi Nazarbaev zıatkerlik mektepteriniń oqýshylary Shyǵys Qazaqstanǵa keldi. Ondaǵy maqsat – «Týǵan elge taǵzym» jobasy aıasynda ólketaný-zertteý jumystaryna qatysty dep habarlaıdy .  

Ekspedısıanyń taqyryby – «Rýhanı jańǵyrý – týǵan jer tutastyǵy men el bolashaǵy» dep atalady. Zıatkerlik mekteptiń oqýshylary Shyǵystyń tamasha tabıǵatyn kózben kórip, kıeli jerlerimen tanysyp, mýzeılerdi, iri-iri ónerkásip oryndaryn aralaýǵa múmkindik aldy. Atap aıtqanda, Óskemende olar «Kazsınk», «Azıa Avto», «Teńge saraıy» sekildi kásiporyndar men sol jaǵalaýda ornalasqan etnografıalyq mýzeıde boldy. Sonymen qatar Ulan aýdanyndaǵy Aqbaýyr tarıhı-arheologıalyq keshenine baryp, kóne paleolıt dáýirindegi tasqa qashalǵan sýretterdi, ejelgi saq qonysynyń qazba jumystaryn kórdi.  

– Bolashaq ınjener-ónertapqysh retinde maǵan kólik qurastyrý zaýytyna saıahat jasaý óte unady. Baǵdarlamadan «Azıa Avto» kásipornyn kórgen kezde erekshe qýandym, óıtkeni ol zaýytty kózben kórý meniń armanym edi. Sol armanym oryndaldy, – deıdi Shymkentten elgen Nazarbaev zıatkerlik mektebiniń 10-synyp oqýshysy Baınazar Seıtek. 

Sondaı-aq ekspedısıa ókilderi Semeı qalasyndaǵy tarıhı oryndar men mýzeılerdi aralap, Jıdebaıdaǵy Abaıdyń mýzeı úıin, «Abaı-SHákárim» memorıaldyq keshenin, Rıdderdegi Batys Altaı memlekettik tabıǵı qoryǵyn, Altaı botanıkalyq baǵyn jáne basqa da oryndarda bolyp, zertteý jumystaryn júrgizdi. Bul sapar aıasyndaǵy zertteýler men jazbalaryn oqýshylar Wikipedia saıtyna jarıalap, respýblıkalyq deńgeıde qorǵaıtyn bolady.