Almatydaǵy 3 birdeı «qoqys» tolyp qalǵan kanaldar kúrdeli jóndeý jumystarynan soń turǵyndardyń paıdalanýyna beriledi. Bul týraly «Qamshy» portaly AlmatyNews-ke silteme jasaı otyryp habarlaıdy.
«Parhach», «Baýma toǵany» jáne «Gúlder» jaǵajaılary bir apta merzimde, sanepıdemıologtardyń qorytyndy tekserýi aıaqtalǵan soń, almatylyqtardyń paıdalanýyna beriletin bolady.
2010-2015 jyldar aralyǵynda kezeń-kezeńimen Úlken Almaty kanalyna (ÚAK) sý jiberý toqtatylyp, kúrdeli gıdrotehnıkalyq rekonstrýksıalyq jumystar júrgizilgen. Nátıjesinde keńes kezeńinde negizi qalanǵan, alaıda eskirip qalǵandyqtan turǵyndardyń qoqys tastaıtyn ornyna aınalǵan 3 birdeı jaǵajaı qaıta qalpyna keltirilgen. Qaıta qalpyna keltirý jumystary úshin qalalyq bújdetten 400 mln. teńge qarjy jumsalǵan.
Aıdyn Temeshov, Almaty qalalyq Tabıǵı resýrstardy qadaǵalaý basqarmasynyń jetekshisi:
-Bul oryndar buryn qoqys tastaıtyn kúresin (svalka) bolyp kelgen. Mańaıyndaǵy turǵyndardyń úılerinen shyǵatyn qoqys qaldyqtary taý bolyp úıilip jatatyn. Betondary úgitilip, kópirleri qulap jatqan. Endi tap-taza, jazda balalar shomylyp, serýendep, demalatyn orynǵa aınaldy. Aınalasy tazartylyp qana qoımaı, kúrdeli jóndeý jumystary júrgizildi. Jaǵajaılarda demalýǵa arnalǵan barlyq qolaılylyqtar qarastyrylǵan. Turǵyndardyń qorqýyna esh sebep joq. ÚAK-ǵa taza taýdyń, Bartoǵaı sý qoımasynyń sýy quıylady. Kanaldyń tereńdigi 2 metr. Jaǵajaı aýmaǵy táýlik boıy kúzetiledi. Ár jaǵajaıda sý-qutqarý qyzmetshileri bar. İshimdik jáne ózge de taýarlar satylmaıdy. Arnaıy dúńgirshekterde sýsyn t.b. taýarlar ǵana satýǵa ruqsat etilgen. Al shomylýshylar úshin balondar tegin beriledi.
«Parhach» jaǵajaıy Rysqulov pen Volochaevskıı, «Baýman toǵany» Súıinbaı men Seıfýllın, «Gúlder» jaǵajaıy Jansúgirov pen Omarov kósheleriniń qıylysy mańynda ornalasqan.
Nurgeldi Ábdiǵanıuly
