Búgin oblystyq opera jáne balet teatrynda «Mereıli otbasy-2015» baıqaýynyń jeńimpazdary marapattaldy. Saltanatty sharaǵa qatysqan oblys ákiminiń orynbasary S.Qanybekov jeńimpaz otbasylardy marapattap, syılyqtar tabys etti. Elimizde úshinshi jyl qatarynan uıymdastyrylyp otyrǵan sharaǵa oblysymyzdan 200-den astam otbasy ótinish bildirip, onyń 30-y irikteýden ótti. Búginde 6 otbasy júldeli oryndy ıemdendi. «Mereıli otbasy» ulttyq baıqaýynyń qorytyndysy boıynsha İ orynǵa túrkistandyq Tańǵatarovtar men shymkenttik Qýatbekovter otbasy laıyqty dep tanyldy. Baıqaýǵa qatysýshy otbasy músheleri eńbekte, sportta, shyǵarmashylyqta, ǵylymda jetistikke jetken áýlet bolýy shart. «Mereıli otbasy» ulttyq baıqaýy otbasy mártebesin kóterýge baǵyttalǵan. Adamgershilikti, rýhanı qundylyqtardy nyǵaıtyp, bala tárbıesindegi ata-ananyń jaýapkershiligin arttyrý maqsatynda ótkizilip jatqan bul shara úsh kezeńde ótti. Ulttyq baıqaýdyń uıymdastyrýshysy oblystyq ishki saıasat jáne din isteri basqarmasynyń basshysy B.Qurmanǵalıdiń aıtýynsha, bıylǵy jyly biz ár orynǵa eki otbasyny belgiledik. Sebebi, laıyqtylar óte kóp. Tańdaý qıynǵa soqty. Úzdik otbasyny anyqtaý barysynda qazylar alqasy otbasynyń ómir súrý saltyna kóbirek nazar aýdardy deıdi. «Mereıli otbasy» ulttyq baıqaýynyń barlyq qatysýshysy baǵaly syılyqtarmen marapattaldy. Jeńimpaz İ oryn ıegerlerine otbasylyq shıpajaıǵa tegin joldama berildi. Aldaǵy ýaqytta Astana qalasynda ótetin respýblıkalyq «Mereıli otbasy» baıqaýynda Ońtústik óńiriniń namysyn  túrkistandyq Tańǵatarovtar men shymkenttik Qýatbekovter otbasy qorǵaıtyn bolady.