Búgin oblys ákiminiń orynbasary E.Aıtahanov Shymkent qalasynyń Eńbekshi aýdanynda ornalasqan 80 oryndyq №9 «Aqqanat» saýyqtyrý bóbekjaı-balabaqshasynyń ashylý saltanatyna qatysty. 1 maýsym - halyqaralyq balalardy qorǵaý kúnine oraı jas tárbıelenýshilerge esigin aıqara ashqan balabaqshada sábıler tórt topta tárbıe almaq. Munda 38 qyzmetker jumyspen qamtylǵan. Jasóspirimderdi merekelerimen quttyǵan óńir basshysynyń orynbasary jańa nysandy aralap kórip, ondaǵy balalarǵa jasalǵan jaǵdaımen tanysty. Salaýatty ómir saltyn qalyptastyrýǵa arnalǵan sport zaly, ár topqa arnalǵan oıyn alańshalary men qysqy jáne jazǵy basseıinder bar. Sonymen qatar, munda balalardyń densaýlyǵyn qadaǵalaıtyn medbıke bólmesi, psıhologıalyq erekshelikterin qadaǵalaıtyn psıholog bólmeleri qarastyrylǵan. «Tulpar» shaǵyn aýdanynda osy kúni №5 «Tulpar» bóbekjaı-balabaqshasy da ashyldy. 320 orynǵa shaqtalǵan bóbekjaı 18 topqa negizdelgen. Úsh tilde bilim beretin baqshada órenderdiń alańsyz tárbıe alýyna jáne olardyń boıyna bilimniń alǵashqy negizin qalaýǵa qajetti jaǵdaıdyń barlyǵy jasalǵan. Bólmeler qazirgi zaman talabyna saı tolyǵymen jabdyqtalǵan, asqana, mýzyka zaly, balalardyń salaýatty ómir saltyn qalyptastyrýǵa arnalǵan sport zaly men ár topqa arnalǵan oıyn alańshalary bar. Osy mektepke deıingi tárbıe uıymynyń ashylý saltanatyna qala ákimi D.Satybaldy qatysyp, balǵyndardy qos qýanyshtarymen quttyqtady. ‒ Jańa oqý jylyna deıin taǵy 4 balabaqsha ashylyp, el ıgiligine paıdalanýǵa berilmek. Elbasy 2020 jylǵa deıin mektepke deıingi balalardy balabaqshamen qamtýdy 100 paıyzǵa jetkizýdi tapsyrǵan bolatyn. Osy oraıda shaharda «Balapan» baǵdarlamasy aıasynda balalardy baqshamen qamtý deńgeıi 76 paıyzdy qurap otyr. Jalpy 2020 jylǵa deıin Shymkentte 7020 oryndyq 25 balabaqsha salynady, ‒ dedi qala basshysy D.Satybaldy.