Jaımashýaq jazdyń alǵashqy kúninen esigimizden attaıtyn dúnıejúzilik balalardyń quqyǵyn qorǵaý kúnine Ońtústik Qazaqstandyq kásipkerler de qarap qalmady. Balalardyń kóńilin kóterý úshin, ata-analar men balapandarǵa keremet meıram syılaý úshin Shymkenttik kásipkerler baryn salǵan eken. Balalar kúnine oraı Shymkentte balalar temirjoly jumysy iske qosyldy. Bul týraly «Qamshy» portaly habarlaıdy. Shymkentte balalardy qorǵaý kúnine oraı Qajymuqan stansasynan Dendrosaıabaq aralyǵyna deıin júrip ótetin «Tulpar» balalar temir joly lokomotıvi ashyldy. Balalar temir joly 1979 jyly sol kezdegi oblys basshysy Asanbaı Asqarovtyń tikeleı basqarýymen salynǵan. Jol uzyndyǵy – 8 shaqyrymǵa jýyq. Bir núkteden ekinshi núktege jetý, shynaıy temir jol nysandaryna uqsas bolý jaǵynan bul temir jolǵa teń keler nysan elimizde joq. Bıyl balalar temir jolyn qaıta jańǵyrtyp, iske qosyp otyr. Árıne, búgingi kún balalar temir jolynyń jolaǵy sostavtyń júrýine jaramdy, al lokomotıv pen vagondar sábıler tasymalyna qabiletti bolǵanymen, aldaǵy ýaqytta semaforlardy jańǵyrtý, joldyń eki jaǵyndaǵy qorǵan zonasyn tazartý, relster men shpaldardy túgelimen tekserýden ótkizip, jaramsyzdaryn aýystyrý, jetpeı turǵan nysandardy salý sıaqty úlken jumystar bar. Búgingi kún balalar temir jolyn qalypqa keltirip, paıdalanýǵa berý máselesimen «Turǵyn úı Shymkent» JSHS aınalysýda.