QR Ekologıa, geologıa jáne tabıǵı resýrstar mınıstrligi buǵan muryndyq bolyp, qazaqstandyqtardy qatysýǵa shaqyrdy, – dep habarlaıdy Atyraý oblysynyń óńirlik komýnıkasıalar qyzmeti. 

Sıntetıkalyq aýlar arzan jáne qoljetimdi bolǵandyqtan, olardy paıdalanyp zańsyz túrde balyq aýlaıtyn adamdar ınspektorlardyń tekserýi kezinde bundaı aýlardy sýǵa laqtyryp, ońaı qutylady. Osynyń saldarynan jaǵalaý aımaǵyn sıntetıkalyq materıaldardan jasalǵan aýlar qoqysqa aınaldyrǵan. Jáne uzaq ýaqyt shirimeıtin bul aýlarǵa balyq shyrmalyp, ólip jatady.

– Bul bizdiń kúndelikti jumysymyz, fýnksıonaldyq mindetimiz. Desek te, Ekologıa mınıstrliginiń osyndaı aýqymdy aksıasy qajet-aq. Bizdiń oblysymyzda atalmysh aksıa óńirdegi barlyq sý aıdyndarynda – Atyraýda, Mahambet, Inder, Qurmanǵazy aýdandarynda ótip jatyr, – dedi orman sharýashylyǵy jáne janýarlar álemi Damba ınspeksıasynyń basshysy Elaman Habıbýllın. 

Oblystyq orman sharýashylyǵy jáne janýarlar álemi ınspeksıasynyń habarlaýynsha, qytaılyq aýlarǵa sýda júzetin qustar da tap bolyp, ólýi múmkin. Bul qorshaǵan tabıǵı ortaǵa jáne sý bıoresýrstaryna orasan zor nuqsan keltiredi. 

Sý aıdyndaryn tazalaýǵa oblystyq orman sharýashylyǵy jáne janýarlar álemi aýmaqtyq ınspeksıasynyń qyzmetkerleri, ákimdikterdiń ókilderi, orman sharýashylyqtary, ekologıalyq uıymdar, belsendiler men volonterlar atsalysty.

Atyraý oblystyq orman sharýashylyǵy jáne janýarlar álemi aýmaqtyq ınspeksıasynyń málimeti boıynsha, sońǵy 3 jylda brakonerler Soltústik Kaspııdiń balyq qorlaryna 254 mln teńge kóleminde nuqsan keltirgen. 

Aksıa barysynda ózennen jarty myń kılometrden astam qytaılyq aýlar shyǵaryldy. Jyl basynan beri Atyraý oblystyq orman sharýashylyǵy jáne janýarlar álemi aýmaqtyq ınspeksıasynyń qyzmetkerleri óńirdegi sý aıdyndarynan, árqaısysy 50 metrden kem emes, 1200-den astam zańsyz aýlardy shyǵaryp aldy. 

Qazirgi kezde balyq ýyldyryq shashý úshin Jaıyqtyń joǵarǵy ýchaskelerine bet aldy. Inder, Mahambet, Atyraý jáne Damba ınspeksıalary bólimderiniń ınspektorlary ózendi túrli aýlaý quraldarynan tazartyp, balyqtyń ótýin qamtamasyz etý úshin kún saıyn Jaıyqtyń ózderine qarasty ýchaskelerin súzip, tekserýde. Osyndaı jumystardy ınspeksıa Qurmanǵazy aýdanyndaǵy Qıǵash ózeninde de júrgizýde.

Atyraý oblystyq orman sharýashylyǵy jáne janýarlar álemi aýmaqtyq ınspeksıasynyń basshysy Danıar Baımaǵambetovtyń aıtýynsha, óńirde zańsyz túrde balyq aýlaýmen kúresý jumystary jalǵasady.