20-25 qyrkúıek aralyǵynda Semeıde Mádenıet jáne sport mınıstrligi Shyǵys Qazaqstan oblysy ákimdiginiń qoldaýymen jáne Qazaqstan teatrlary asosıasıasynyń uıymdastyrýymen Qazaqstannyń halyq artısi, Memlekettik syılyqtyń laýreaty, kórnekti teatr jáne kıno aktrısasy Ámına Ómirzaqovanyń 100 jyldyǵyna arnalǵan Qazaqstan drama teatrlarynyń XXVII respýblıkalyq teatr festıvali ótedi.
Festıvál Qazaqstanda teatr ónerin dáriptep, kópshilikke taratýǵa, dástúrli teatr ónerin saqtap, ári qaraı damytýǵa, daryndy artıser men rejıserlerdi anyqtap, olarǵa qoldaý kórsetýge, zamanaýı sahna prosesindegi negizgi basymdyqtardy anyqtaý, óskeleń urpaqtyń boıynda otansúıgishtik qasıetti damytýǵa jol ashyp, teatr ónerin damytýǵa múmkindik týǵyzady.
Sondaı-aq, shara qazaqtyń kórnekti kıno jáne teatr aktrısasy, Qazaqstannyń halyq artısi, Memlekettik syılyqtyń laýreaty Ámına Ómirzaqovanyń esimin el esinde máńgi qaldyrý, onyń shyǵarmashylyǵy jáne murasymen tanystyrý maqsatynda uıymdastyrylmaq.
Festıválge elimizdiń 12 teatr ujymy úzdik qoıylymdarymen qatysady. Alty kún boıy Semeı qalasynyń qonaqtary men turǵyndary festıvál barysynda Q.Qýanyshbaev atyndaǵy Memlekettik akademıalyq qazaq mýzykalyq drama teatry, Ǵ.Músirepov atyndaǵy Qazaq memlekettik akademıalyq balalar men jasóspirimder teatry, Abaı atyndaǵy qazaq mýzykalyq drama teatry, N.Jantórın atyndaǵy Mańǵystaý oblystyq mýzykalyq-drama teatry, M.Gorkıı atyndaǵy Memlekettik akademıalyq orys drama teatry, F.M. Dostoevskıı atyndaǵy orys drama teatry, Qyzylorda oblystyq N.Bekejanov atyndaǵy qazaq mýzykalyq drama teatry, «Nomad» teatry, J.Aımaýytov atyndaǵy Pavlodar oblystyq qazaq mýzyka-drama teatry, «Darıǵa-Aı» jastar teatry, S.Muqanov atyndaǵy Soltústik Qazaqstan oblystyq qazaq sazdy-drama teatry, Shyǵys Qazaqstan oblystyq drama teatrlarynyń qoıylymdaryn tamashalaı alady.
Baspasóz konferensıasy – 20 qyrkúıekte saǵat 10.00-de, festıváldiń saltanatty ashylý rásimi – 20 qyrkúıekte saǵat 11.00-de, festıváldiń saltanatty jabylý rásimi – 25 qyrkúıekte saǵat 19.00-de, sondaı-aq festıvál qoıylymdary 20-25 qyrkúıek aralyǵynda Abaı atyndaǵy qazaq mýzykalyq drama teatrynyń ǵımaratynda ótedi.
Kelem deýshilerge esik ashyq.
BAILANYS TELEFONDARY: 8 707-808-18-90
