Memleket basshysy Qasym-Jomart Toqaev Joldaýda «Ata zańymyzǵa sáıkes azamattardyń óz oıyn erkin aıtýǵa quqyǵy bar» ekendigin basa aıtty. Sondyqtan, Taraz qalasy men aýdan ákimderimen birlese otyryp, qoldanystaǵy zańnama aıasynda beıbit aksıalar jáne narazylyq sharalaryn uıymdastyrý tártibi men ótkizý oryndaryn qaıta qaralýda dep jazady Qamshy.kz aqparat agenttigi. 

«El birligi – onyń áralýandyǵynda!» prınsıpi Jambyl oblysynda turatyn 87 etnos pen etnıkalyq toptyń ókilderi úshin basty ustanymǵa aınalýy tıis. Qazaq halqynyń memleket quraýshy ult retindegi rólin bekemdep, etnosaralyq tatýlyq pen dinaralyq túsinistikti qalyptastyrý – mańyzdy mindet.

Oblystyq Qazaqstan halqy Assambleıasynyń hatshylyǵy, Taraz qalasy men aýdan ákimderi ultaralyq tatýlyqty nyǵaıtýda júıeli jumystar júrgizetin bolady.

Jaqyn arada qabyldanatyn «Azamattyq qoǵamdy damytýdyń 2025 jylǵa deıingi tujyrymdamasynda» úkimettik emes uıymdardyń jaýapkershilikteri artyp, jańa mindetter júktelmek.

Sonymen birge, aldaǵy jyly Ál-Farabıdiń 1150 jyldyq, Abaı Qunanbaıulynyń 175 jyldyq mereıtoılaryn atap ótý boıynsha oblys deńgeıinde tárbıelik máni bar is-sharalar uıymdastyrylatyn bolady. El ómirindegi mańyzdy mereke - Táýelsizdigimizdiń 30 jyldyǵyna baılanysty ótkiziletin sharalar táýelsiz memleketimizdiń jetistikteri men qundylyqtaryn jastarymyzdyń tereń bilip, sezinýlerine baǵyttalmaq.

Azamattardyń quqyqtary men qaýipsizdigin qamtamasyz etý de óz aldyna úlken mindet.

Memlekettik organdar tarapynan kórsetiletin qyzmetter jemqorlyqqa ıtermeleýshi faktor ekendigi belgili. Ústimizdegi jyly «Jambyl – adaldyq alańy» jobasy aıasynda turǵyndar tarapynan 140 shaǵym túsip, onyń 52 máselesi sheshilgen, qalǵan 88 másele baqylaýǵa alyndy.

Memlekettik qyzmet kórsetýdi barynsha ashyq bolýyn qamtamasyz etý, turǵyndarǵa qolaıly jaǵdaı jasaý maqsatynda 6 servıstik ákimdikter men front-ofıster ashylyp, 7 mekemeniń basshysy «oýpen speıs» formatynda jumys isteýge kirisse, 133 memlekettik organ basshysy kabınetterin birinshi qabatqa kóshirdi.

Sondyqtan, bul jumystar ári qaraı da pármendi júrgizile bermek.