Táýelsiz Qazaqstannyń tól teńgesin aınalymǵa engizý týraly zańǵa 1993 jyldyń 12 qarashasynda qol qoıyldy. Arada úsh kún ótken soń qazaqstandyqtar jappaı saýda jasaý, esep aıyrysý kezinde tól valútany qoldana bastady. Osy bir tarıhı oqıǵa tarıhı Taraz jerinde bastaý alǵan edi, dep jazady Qamshy.kz aqparat agenttigi. 

29 jyl buryn Qazaqstandaǵy jańa valútany engizilýimen elimizde táýelsizdigimizdi, birtutastyǵymyzdy aıshyqtaıtyn taǵy bir tól belgimiz paıda boldy. Osynaý tarıhı oqıǵanyń Taraz jeri tarıhynda ózinshe iz qaldyrǵanyn búginde bireý bilse, bireý bilmeıdi. Shynynda 2000 jyldan astam tarıhy bar Taraz qalasynda tıyndardy soǵý isi sonaý VI-VIII ǵasyrda keń qanat jaıǵanyn arheologıalyq qazba jumystary aıǵaqtaıdy. Dál osy tarıhı oqıǵamen sabaqtasyp, táýelsiz Qazaqstannyń tól teńgesi de Taraz qalasyna alǵash taban tirep, óte qupıa operasıa retinde respýblıkanyń túpkir-túpkirine jol tartty.

–Elbasy ulttyq valútany qoldanys engizý jaıly sheshim shyǵarǵan soń onyń nobaıyn jasaý úshin arnaıy mamandar toby jasaqtaldy. 1992 jyly alǵashqy banknotalar Ulybrıtanıadaǵy 400 jyldan beri osy salaǵa mamandanǵan «Harrıson jáne onyń uldary» kompanıasynda basylyp shyǵaryldy. Al 1993 jyly 12 qarashada «Qazaqstan Respýblıkasynda ulttyq valútany engizý» týraly Jarlyqqa qol qoıylyp, úsh kúnnen soń qazaqstandyqtar tolyǵymen teńgeni paıdalanýǵa kóshti. Maǵan osynaý shaqta Ulttyq banktiń oblystyq fılıalynyń dırektory retinde aýqymdy jumystardyń basy-qasynda júrý baqyty buıyrdy.

Qazirgi Taraz qalasyndaǵy Ulttyq Banktiń oblystyq fılıaly ornalasqan ǵımarat Keńes odaǵy tusynda Memleketik bank qoımasynyń Ortalyq Azıadaǵy №2 qoımasy bolǵan.Máskeýden kelgen aqsha osy jerden odaqtas elderdiń ortalyq Azıada ornalasqan bólikterine taraıtyn. Sondyqtan elimizdiń tól valútasyn qoldanysqa engizý kezinde de Qazaqstandaǵy eń úlken qoımasy bank retinde tańdaý Taraz qalasyna tústi. Sáıkesinshe Anglıada basylǵan banknottar aptasyna bir ret arnaıy ushaqpen birden Tarazǵa jetkizilip otyrdy. Árıne bul áreketterdiń barlyǵy óte qupıa túrde júrgizildi, –deıdi sol kezderi QR Ulttyq Bankiniń oblystyń fılıalyn basqarǵan Aıdaıbek Halımbetov.

Ulttyq valútanyń 20 jyldyǵy qarsańynda QR Ulttyq Bankiniń oblystyń fılıaly ǵımaratynyń aldynda tól teńgeniń kúlli Qazaqstanǵa osy jerden taralǵanyn aıǵaqtaıtyn arnaıy stela ornatylǵan.