Qazaqstan Respýblıkasy Ekologıa, geologıa jáne tabıǵı resýrstar men Bilim jáne ǵylym mınıstrlikteri, Qoǵamdyq mańyzy bar bastamalardy damytý qory, Ekologıalyq uıymdar qaýymdastyǵynyń birlesken bastamasymen «Eko saǵat» respýblıkalyq aksıasy ótti.
Óskeleń urpaqty tabıǵı resýrstardy kútý jáne saqtaý máselelerine tartý maqsatynda ótken shara aýdanymyzdyń barlyq mektepterinde uıymdastyryldy. Bastaýysh, orta jáne joǵary synyptarda tanymdyq-damytýshylyq dárister ótkizilip, anımasıalyq rolıktermen qatar beıne aınalym kórsetildi. Sondaı-aq, Baızaq aýdany orman jáne janýarlar dúnıesin qorǵaý bóliminiń demeýshiligimen 500 týıa aǵashtary bilim oshaqtaryna jıyrma túpten taratylyp berildi.
Respýblıkalyq aksıaǵa oraı Ǵanı Muratbaev atyndaǵy gımnazıasynda ótken sharaǵa aýdandyq máslıhattyń hatshysy Nurjan Tlepov qatysty. Nurjan Seıdezimuly qorshaǵan ortany qorǵaýdyń mańyzdylyǵyn aıtyp, egilgen ár aǵashtyń aýa alabyna tıgizer paıdasyna toqtaldy. Oqýshylardy otyrǵyzylǵan aǵashtardy kútip ustaýǵa shaqyryp, olarmen birge aǵashtar otyrǵyzdy. Budan soń oqýshylar men pedagogtar mektep janyndaǵy ýchaskelerge týıa aǵashyn egip, aksıaǵa ózderiniń úlesterin qosty.
Aksıaǵa aýdan boıynsha 20390 oqýshy, 720 muǵalim, ata-analar, ardager ustazdar, aýyldyq okrýg ákimderi, aýdan ákimdigine qarasty bilim bóliminiń mamandary men ádiskerleri qatysty.
Dúnıejúzilik mekendeý ornyn qorǵaý kúnine oraı ótkerilgen «Eko saǵat» respýblıkalyq aksıaǵa Úlgili orta mektebiniń pedagogıkalyq ujymy men oqýshylary da belsene qatysty. Aldymen bastaýysh synyptarynda «Eger Jer alma bolsa!» taqyryptarynda ekologıalyq saǵattar, joǵary synyptarda ósimdik jáne janýarlar álemi men sý resýrstaryn saqtaý, alyp muhıttardyń jaǵdaıy, qorshaǵan orta tazalyǵy, aýa raıynyń jylyp kele jatqandyǵy týraly keńinen aqparattar berilip, tájirıbeler júrgizildi.
Aksıada mektep dırektory Núrken Kenjequlov sóz alyp, aıtýly sharanyń mańyzy týraly qysqasha aqparattandyrdy.Jas óskinderdiń tabıǵatqa, týǵan ólkege uqypty qaraý, tabıǵı jáne sý resýrstaryn, ósimdik jáne janýarlar álemin saqtaý qajettigin aıtyp, Jer-Ananyń baılyǵyn qorǵaý - ortaq mindet ekendigin jetkizdi.
Saǵat tili 12.00-di soqqanda mektep aýlasyna 20 túp týıa otyrǵyzyldy. Sondaı-aq, 1 jáne 11-synyp oqýshylarynyń ata-analarynyń demeýshiligimen qosymsha 5 túp týıa egildi.
Sonymen qatar aksıa barysynda barlyq synyp oqýshylaryna qorshaǵan ortany qorǵaýdyń basty maqsaty - adamzat damýy men qorshaǵan orta arasyndaǵy úılesimdilikti ornatý bolyp tabylatyndyǵy sóz boldy. Budan bólek, jas jetkinshekter boıynda ekologıalyq mádenıetti qalyptastyrý ádistemesi aıtylyp, árbir adam tabıǵatty aıalaýy kerektigi, qorshaǵan ortany lastaǵandarǵa belgili mólsherde aıyppul salynatyndyǵy, Qazaqstanda qorshaǵan ortany qorǵaýǵa baılanysty birneshe zań aktileri qabyldanǵany, olardyń maqsaty - elimizdiń tabıǵat baılyqtaryn bolashak urpaq úshin saqtaý bolyp tabylatyndyǵy jóninde oılar ortaǵa salyndy.
