Zıatker urpaq – tek bilimi tereń azamat qana emes. Ol qoǵamdaǵy bolyp jatqan oqıǵalardan shet qalmaı, óziniń azamattyq ustanymyn tanyta biletin, qajet jaǵdaıda bastamashy bolyp, ıgi isterdiń basy-qasynan tabylatyn jan. Elbasy N. Nazarbaevtyń «Nazarbaev Zıatkerlik mektepterin» ashýdaǵy basty maqsaty da osyndaı sanaly urpaqty tárbıeleý. Bul rette atalǵan mektepterdiń oqýshylary óz zamandastarynan oq boıy alda kele jatqanyn dáleldep keledi.
Sonyń bir dáleli – Tarazdaǵy Nazarbaev Zıatkerlik mektebinde jalǵyz basty qarıalardy qoldap, qurmetteýge baǵyttalǵan «Urpaqtar sabaqtastyǵy» áleýmettik jobasynyń tusaýkeseri ótti. Ashylý saltanatyna 50-ge jýyq jalǵyz basty qarttar men áleýmettik ortalyq ókilderi shaqyryldy.
Mektep oqýshylary men pedagogtary qarıalarǵa arnap qolóner boıynsha túrli sheberlik synyptaryn ótkizdi. Sońynan qonaqtar konserttik baǵdarlamany tamashalap, astan dám tatty.
– Taraz qalasynda 20 000 astam zeınetker bolsa, solardyń 350-i jalǵyz basty. Búgin sol qarıalardyń birshamasy Nazarbaev Zıatkerlik mektebine keldi. Qarıalar balalarmen birge shyǵarmashylyqpen aınalysyp, ýaqytty keremet ótkizdi. «Urpaqtar sabaqtastyǵy» jobasynyń jas urpaqqa bereri kóp. Elimizde osyndaı bastamalar kóbeıse degen tilegimiz bar, – dedi arnaýly áleýmettik qyzmet kórsetý ortalyǵynyń ókili Juldyz Dalıeva.
Joba maqsaty zeınetkerlik jastaǵy jalǵyz basty qarıalar men mektep oqýshylary arasynda qarym-qatynas ornatý arqyly urpaqtar sabaqtastyǵyn damytý. Apta saıynǵy mádenı-tanymdyq, oıyn-saýyq jáne saýyqtyrý sharalary arqyly qarıalardyń emosıonaldy jaǵdaıyn jaqsartý, ómir belsendiligin arttyrý, qarym-qatynas ortasyn keńeıtý kózdelgen. Olardyń arasynda birlesip kitap oqý, kompúterlik saýattylyqty arttyrý, qımyl-qozǵalys terapıasy, qolóner saǵaty, án salý, mýzykalyq aspapta oınaý, retro bı keshi, art-terapıa, ıntellektýaldyq oıyndar jámenne fıtnes zalda jattyǵý jasatý da bar.
Sondaı-aq, mektep oqýshylary men qyzmetkerleriniń apta saıyn qarıalarǵa úı men aýla tazalaý, dári-dármek pen azyq-túlikke baryp kelý, otyn jarý sıaqty sharýalarda kómek berýi de josparlanyp otyr. Óz kezeginde qarıalar jaqsy meńgergen daǵdylaryn oqýshylarǵa úıretip, mektepte kishigirim úıirme jumysyn júrgizýine jaǵdaı jasalady.
Joba avtorlary mundaı tyǵyz qarym-qatynas oqýshylardyń qoǵamdaǵy áleýmettik máselelerdi, atap aıtsaq egde jáne qart jastaǵy adamdardyń ómirin jeńildetýge baǵyttalǵan sheshimder, qurylǵylar oılap tabýyna túrtki bolady degen oıda.
