Elbasy-Qazaqstan Respýblıkasynyń Tuńǵysh Prezıdenti Nursultan Ábishuly Nazarbaev azattyqtyń alǵashqy jyldarynan bastap egemen elimizdiń erteńi sanalatyn jastar máselesin nazardan tys qaldyrǵan emes. Tipti, ekonomıkalyq qıyndyqtarǵa qaramastan «Bolashaq» baǵdarlamasynyń qabyldanýyna yqpal etip, óskeleń urpaqty álemniń mańdaıaldy oqý oryndarynda bilim alýyna jol ashty. Keıinnen memlekettik jastar saıasaty týraly zań qabyldanyp, jer-jerde arnaıy ortalyqtar iske kiristi. Bilim granttarynyń sany da artyp, jastardyń jumyspen qamtylýyna da kóptep kóńil bóline bastady. Munyń bári de Ult kóshbasshysynyń shynaıy qamqorlyǵy ekendigi daýsyz. Al, bıylǵy jyldyń Elbasynyń bastamasymen Jastar jyly bolyp jarıalanýy bul baǵyttaǵy jumystardy jandandyra tústi.
Búginde Jambyl oblysynda da jastar saıasaty tóńireginde tyndyrymdy tirlikter tiktelýde. Aımaqta 2019-2020 jyldarǵa arnalǵan memlekettik jastar saıasatyn iske asyrý jónindegi Jol kartasy ázirlenip, bekitildi. Atalǵan qujatqa sáıkes josparly jumystar atqarylýda.
Aıta ketý kerek, Jol kartasy 6 bólim, 65 tarmaqtan turady. Atap aıtqanda, jastardy bilimmen qamtý boıynsha 10 tarmaq, jastardy jumyspen qamtý turǵysynda 7 tarmaq, jastardyń ınovasıalyq jáne kásipkerlik belsendiligin arttyrý negizinde 11 tarmaq, densaýlyq saqtaý salasynda 4 tarmaq, jastardyń bos ýaqytyn tıimdi uıymdastyrý boıynsha 32 tarmaq, jastardy, jas otbasylardy turǵyn úımen qamtý jaıynda 1 tarmaq qamtylǵan.
Búgingi kúnge onyń 15-i oryndalyp, baqylaýdan alyndy. Al 43 tarmaq oryndalý ústinde. Sonymen qatar jeteýi jyl sońyna deıin oryndalady.
Jalpy, óńirde 239 myńnan astam jas bar, bul oblys halqynyń 21,2 paıyzyn quraıdy. Onyń ishinde NEET sanatyndaǵy jastardyń úlesi 2019 jyly 7,7 paıyzdy nemese 18 414 jasty qurady.
Al jastar arasyndaǵy jumyssyzdyq deńgeıi 2019 jyly 2,4 paıyz deńgeıinde qalyptasyp otyr. Respýblıka boıynsha kórsetkishtiń 3,7 paıyz ekenin eskersek, edáýir ilgerileý bar.
Sonymen qatar jumyssyzdyqtyń aldyn alý jáne jastarǵa mamandyqty durys tańdaýǵa kómek kórsetý maqsatynda ázirlengen «Túlekter taqtasy» jobasy oblystaǵy 341 mektepte, 24 kásiptik-tehnıkalyq bilim berý mekemelerinde ornatylǵan.
