Apat aıtyp kelmeıdi. Desek te turǵyndardyń ómirine qaýip pen qater tóndirip, tabıǵatqa da orasan zor zalal keltiretin apattar, basqa da tótennen týyndaıtyn qıyn jaǵdaılar bolsyn daıyndyq jumystarynyń mańyzy zor. Qaýipsizdik sharalaryn saýatty qoldaný arqyly aıtpaı keletin apattyń shyǵyndary men zalaldaryn azaıtýǵa bolady.

Jambyl oblysy seısmıkalyq apat oryn alýy yqtımaldyǵy joǵary aımaq bolyp sanalmasa da jyl saıyn oqý-jattyǵý jumystary ótkizilip otyrady. Bıyl da solaı boldy. Atap aıtqanda, Jýaly aýdanynyń aýmaǵynda Jambyl oblysynyń basqarý organdaryn, azamattyq qorǵanys kúshterin daıyndaý boıynsha keshendi oqý-jattyǵý ótkizildi.

Komandalyq shtabtyq oqý-jattyǵýdyń maqsaty – basqarý organdary basshy quramynyń azamattyq qorǵanys qurylymdary jasaqtaryn daıyndyqqa keltirý jáne laıly sel zardaptaryn joıýǵa qurylymdar jiberý jónindegi áreketterin is júzinde atqarý bolyp tabylady. Sonymen qatar qurylǵan tótenshe jaǵdaılardy joıý josparlaryn, azamattyq qorǵanys josparynyń iske asyrylýyn, basqarý organdarynyń, aýdannyń azamattyq qorǵaý qyzmetteriniń beıbit jaǵdaıdan soǵys kezeńinde mindetterdi maqsatqa saı sheshýge daıyndyǵyn tekserý.

Komandalyq shtabtyq oqý-jattyǵýy aýdan ákimi apparatynyń májilis zalynda aýdan aktıviniń qatysýymen ótken keńes jumysynan bastaý aldy. Jıynǵa azamattyq qorǵaý qyzmetteriniń basshylary, aýyldyq okrýgtiń ákimderi shaqyrylyp, keshendi oqý-jattyǵý ótkizý boıynsha aýdannyń AQ qyzmetteriniń basshylyq quramyna birqatar naqty tapsyrmalar berildi.

Jattyǵýǵa tyńǵylyqty daıyndyq jumystary tús aýa qaıta jalǵasty. Onda is-sharaǵa jaýapty tulǵalar aýdandyq polısıa bóliminde bolyp, tótenshe jaǵdaılar kezinde turǵyndardy qulaqtandyrýǵa arnalǵan sıgnaldardy tekserdi. Keshendi oqý-jattyǵýdyń negizgi bóligi kelesi kúni boldy. Tótenshe jaǵdaıdy joıý úshin tartylatyn jeke quram men tehnıkalar sapqa turǵyzylyp, shtab músheleri olardyń daıyndyǵymen jeke-jeke jáne jan-jaqty tanysyp shyqty. Keshendi jattyǵý Qaırat aýylynda «Bosqyn» praktıkalyq jattyǵýymen jalǵasyp, shekaralas memleketterden kelgen bosqyndardy qabyldaý jáne qalypty tirshilik jaǵdaıyn qamtamasyz etý jumystary arnaıy tigilgen lagerde uıymdastyryldy. Odan keıin aýyl sharýashylyǵy janýarlary men ósimdikterin zalalsyzdandyrýdy uıymdastyrý, adamdardy janýarlardyń juqpaly aýrýlarynan qorǵaý jónindegi jáne asa qaýipti ınfeksıany juqtyrý anyqtalǵan jaǵdaıda karantındik is-sharalar da «İndet» praktıkalyq jattyǵýy aıasynda óz deńgeıinde ótti. Qarasaz aýyldyq okrýginde erikti órt sóndirý quramalarynyń daıyndyǵy zerdelenip, orman-dala órtterin sóndirý boıynsha praktıkalyq pysyqtaýlar júrgizildi.

Keshendi oqý-jattyǵý uıymshyldyqpen ótip, oǵan oblystyq TJD azamattyq qorǵanys bóliminiń bastyǵy, oqý-jattyǵý basshylyǵy shtabynyń bastyǵy Áset Manasov oń baǵasyn berip, ony óz deńgeıinde uıymdastyrýǵa atsalysqan aýdan basshylyǵyna alǵys aıtty. Sonymen birge oqý-jattyǵý jıynynyń beıbit jaǵdaıda ǵana ótýine tilektestigin bildirdi.