M. H. Dýlatı atyndaǵy Taraz memlekettik ýnıversıteti QS EECA University Ranking-2020 halyqaralyq reıtıńisi boıynsha álemniń úzdik 350 joǵary oqý oryndarynyń qataryna endi.
Lıtva Respýblıkasynyń Kaýnas qalasynda ótip jatqan QS in Conversation «Halyqaralyq yntymaqtastyq arqyly tanymaldylyqty arttyrý: utqyrlyq, taný, brendıng» atty Halyqaralyq samıtinde QS EECA-2020 (Emerging Europe & Central Asia ) reıtıńisiniń qorytyndysy ashyq túrde jarıalandy. Reıtıń qorytyndysy boıynsha Dulaty University QS EECA reıtıńisine alǵash ret qatysyp, úzdik 350 ýnıversıtet qataryna kirdi.
QS (Quacquarelli Symonds) EECA reıtıńisi damýshy Evropa jáne Orta Azıa elderiniń úzdik 350 ýnıversıtetin anyqtaıtyn bedeldi reıtıń. Atalmysh reıtıń ýnıversıtettiń 9 kórsetkishin taldaıdy. Olar: JOO-nyń akademıalyq jáne jumys berýshiler arasyndaǵy bedeli, stýdentter sanynyń qyzmetkerler sanyna araqatynasy, bir qyzmetkerge keletin ǵylymı jarıalanymdar sany, sıtatalar sany, ýnıversıtettiń Internettegi tıimdiligi, ǵylymı dárejeleri bar qyzmetkerler úlesi, sheteldik qyzmetkerler jáne sheteldik stýdentter sany. Osy oraıda reıtıńke M.Lomonosov atyndaǵy Máskeý Memlekettik ýnıversıteti (Reseı) kósh bastap, Charlz ýnıversıteti (Chehıa), Varshava tehnologıalyq ýnıversıteti (Polsha), Vılnús Ýnıversıteti (Lıtva) jáne Stambýl ýnıversıteti (Túrkıa) syndy ózge de bedeldi oqý oryndar qatysty.
Álemniń ozyq ýnıversıtetterin biriktirgen QS-in Conversation «Halyqaralyq yntymaqtastyq arqyly tanymaldylyqty arttyrý: utqyrlyq, taný, brendıng» samıtinde álemdik eńbek naryǵynda úlken suranysqa ıe bolatyn qabiletti maman daıyndaý, ǵylymdy damytý, akademıalyq utqyrlyq týraly túrli máseleler aıtyldy.
Esterińizge sala keteıik, M. H. Dýlatı atyndaǵy Taraz memlekettik ýnıversıteti 1958 jyly qurylǵan. Búginde oqý ordasy elimizdegi eń iri memlekettik joǵary oqý oryndarynyń biri sanalady. TarMÝ oblystaǵy jalǵyz memlekettik kópbeıindi joǵary oqý orny bolyp tabylady. Ýnıversıtette jalpy kólemi 73924,4 sharshy m. quraıtyn 14 oqý-laboratorıalyq ǵımarat jáne jańa ólsheý quraldarymen jabdyqtalǵan 155 laboratorıa bar.
