Jambyl oblystyq Dostyq úıinde «Jastardyń qoǵamdyq sanasyn jańǵyrtý: áleýeti, keleshegi jáne máseleleri» taqyrybynda oblystyq ǵylymı-praktıkalyq konferensıa ótti dep jazady Qamshy.kz aqparat agenttigi. Atalmysh konferensıanyń uıymdastyrýshylary Jambyl oblysy ákimi apparatynyń «Qoǵamdyq kelisim» komýnaldyq memlekettik mekemesi jáne M.H. Dýlatı atyndaǵy Taraz memlekettik ýnıversıteti joǵary oqý oryndarynyń oqytýshylaryn, ǵalymdardy, fılosoftardy jáne etnomádenı birlestikterdiń ókilderin konferensıa jumysyna qatysýǵa shaqyrdy. Konferensıada jas urpaqty qalyptastyrý men ilgeriletý jáne qazaqstandyq qoǵamdy damytýdaǵy sabaqtastyqty qamtamasyz etýdiń negizgi faktory retinde jastardyń qoǵamdyq sanasyn jańǵyrtýǵa baǵyttalǵan máselelerdi talqylady.

Igi istiń uıymdastyrýshylary ǵylymı qoǵamdastyq pen áleýmettik-saıası ınstıtýttardyń kúsh-jigerin biriktirý úshin osyndaı is-sharalardyń joǵary mańyzdylyǵyn atap kórsete otyryp, memlekettik qurylym ókilderiniń, qoǵam ókilderiniń qoǵam úshin ózekti máselelerin jıynǵa qatysýshylardyń nazaryna usyndy.

-Búgingi konferensıanyń maqsaty jastardyń qoǵamdyq sanasyn oıatý, olardy sanaly tulǵa retinde qalyptastyrý. Ómirlik ustanymdaryn, kózqarastaryn keńeıtip, álemdik jahandaný úderisinde bolyp jatqan kóptegen jańalyqtardan qalys qalmas úshin, olardyń bilimge den qoıýyn qamtamasyz etý. Búgingi jıynda osy máseleleler talqylandy. Jastarymyzdyń konferensıadan oıǵa túıgeni kóp dep oılaımyz, - dedi Jambyl oblysy Qazaqstan halqy Assambleıasy janyndaǵy ǵylymı-saraptamalyq tobynyń múshesi, M.H.Dýlatı atyndaǵy Taraz memlekettik ýnıversıtetiniń «Fılosofıa jáne saıasattaný» kafedrasynyń meńgerýshisi, fılosofıa ǵylymdarynyń kandıdaty Dına Dúısebaıqyzy.

Konferensıa barysynda plenarlyq otyrys ótkizilip, birqatar seksıa boıynsha ózekti taqyryptarda pikirler aıtyldy. Tarqatyp aıtar bolsaq: «Qazirgi jastardyń rýhanı jańǵyrýy jáne onyń túrli salalarda kórinis tabýy – óner, din, moral, ǵylym, quqyq, ıdeologıa, ekonomıka, eńbek jáne t.b.», «Jas qazaqstandyqtardyń rýhanı jańǵyrýyndaǵy qundylyq baǵdarlary (bazalyq ulttyq rýhanı qundylyqtar, rýhanı qundylyqtar júıesindegi ózgerister men sabaqtastyq)», «Naqty jaǵdaılardan týyndaıtyn jastardyń qoǵamdyq sanasynyń elementteri (áleýmettik armandar, boljamdar, aldyn ala boljam)», «Jastardyń jappaı sanasy – kórinis, erekshelikter, retteý quraldary», «Jastardyń qoǵamdyq sanasyna jahandyq buqaralyq komýnıkasıa quraldarynyń áseri (BAQ, ınternet)» týrasyndaǵy máseleler talqyǵa salyndy.

Ótkizilgen konferensıanyń qorytyndysy boıynsha plenarlyq otyrysta jáne seksıalarda usynylǵan baıandamalar taqyryptary boıynsha maqalalar jınaǵy shyǵaryldy.