Jambyl oblysy ákimi apparatynyń «Qoǵamdyq kelisim» KMM-niń Dostyq úıinde «Gastronomıalyq dámder dastarhany» atty etnoaspazdyq festıvali ótti, dep jazady Qamshy.kz aqparat agenttigi. 

Festıváldiń maqsaty ulttyq taǵamdardy dáripteý jáne oblys etnostarynyń gastronomıasymen tanystyrý, aspazdyq dástúrlerdi jáne taǵam mádenıetin saqtaý, ulttyq taǵamdardyń ózindik ereksheligin jas urpaqqa qazirgi zamanǵy jaǵdaıda kórsetý, etnıkalyq taǵamdardy daıyndaýda jańa tehnologıalardy qoldaný.

Sharaǵa Jambyl oblysy boıynsha Qazaqstan halqy Assambleıasynyń hatshylyǵy, etnostardyń ulttyq taǵamdaryn daıyndaý sheberleri, «Jańǵyrý joly» jastar qozǵalysynyń belsendileri, oblystyń etnomádenı birlestikteriniń jas músheleri, oblystyq jáne qalalyq BAQ ókilderinen quralǵan barlyǵy alpystan astam adam qatysty.

Eki bólimnen quralǵan is-shara «Rýhanı jańǵyrý» jobasy aıasynda júzege asýda. Festıvál basy «Úkilim-aı» bıshiler tobynyń «Shattyq» bıimen jáne Jambyl oblysy boıynsha Qazaqstan halqy Assambleıasy tóraǵasynyń orynbasary, hatshylyǵynyń meńgerýshisi Qojaeva Marjan Tóreǵulqyzynyń alǵy sózimen bastaldy. Festıváldiń birinshi bóliminde aspazdar ulttyq taǵamdardan sheberlik synyptar kórsetti. Abaı dáýirindegi qazaq taǵamdarynan Sıhımbaeva Symbat Qaldybekqyzy «İsh maı» jáne «Búrme qaryn» atty sheberlik synybyn ótkizdi. Qarashaı-balqar halqynyń ulttyq taǵamdar pisirý boıynsha Aldabaeva Maısa Mýshýkbekqyzy óz tájirıbelerimen bólisti. Tez daıyndalatyn taǵamdardyń sheberlik synybyn Abdyqaharova Lola Ábdirasýlqyzy ótkizdi. Sondaı-aq, ol taı halyqtarynyń ıaǵnı shyǵys elderiniń taǵamdaryn sýshı, baklajan jáne týralǵan kókónisterdi qalaı daıyndaý kerektigi týraly da óz tájirıbelerimen bólisti. Sheberlik synyptyń ulttyq sýsyndar jáne zamaýı kokteılder daıyndaý boıynsha sońǵy sabaqty Bogdanov Aleksandr ótkizdi. Ol qyshqyl sútten «Shalap» sýsynyn jáne túrli kokteılderdi daıyndaýdy kórsetti. Festıváldiń birinshi kezeńi aspazdyq úlgide kıingen jastardyń bı fleshmobymen aıaqtaldy.

Jambyl oblysy ákimi apparatynyń «Qoǵamdyq kelisi» KMM bas sarapshysy Albına Tapaeva: «Qazaqstan halqy óńirlik assambleıasy janynan jumys isteıtin ǵylymı-saraptamalyq top ulttyq as úı máselesine etene jaqyndap, etnıkalyq mádenıettiń bir bóligi retinde olardyń fılosofısyn kórsetýdi sheshtik. Sondyqtan «Gastronomıalyq dámder dastarhany» festıvali qatysýshylarǵa gastronomıamen tanystyrýmen ǵana emes, ár etnostyń mádenı kodyn saqtaýǵa múmkindik beredi. Bul basqa etnostardyń mádenıetine qatysty tózimdilikke negizdelgen qazaqstandyq biregeıliktiń negizi bolyp tabylady. As úı — bul tek tamaq tutyný orny ǵana emes, sonymen qatar etnos dúnıetanymynyń bir bóligi, onyń dám fılosofıasynyń oshaǵy ekenin sezindirgimiz keledi»,- dedi óz sózinde.

İs-sharanyń ekinshi kezeńi ulttyq asqananyń tusaýkeserin, tamaqtaný mádenıetinde dástúrli ustanymdardy saqtaýdy kórsetti.