Qazaqstanda álemdegi qazaq dıasporalaryn qoldaýdyń memlekettik baǵdarlamasy ázirlenip jatyr. Ol etnıkalyq qazaqtarǵa arnaıy kýálikter shyǵarýdy qarastyrady. Bul týraly Ombydaǵy Qazaqstan men Reseıdiń óńiraralyq forýmy aıasynda ótken bıznes-forýmda "Otandastar" qorynyń birinshi vıse-prezıdenti Talǵat Adýov aıtty, dep jazady Sputnik Qazaqstan.

Dıasporalardy qoldaýdyń memlekettik baǵdarlamasyn 2020 jyldyń kóktemine qaraı aıaqtaý josparlanýda. Baǵdarlama el basshylyǵy deńgeıinde tanystyrylmaq.

Sonymen qatar 2020 jyldyń kókteminde «Otandastar» qory otandastar forýmyn ótkizýdi josparlap otyr, onda memlekettik baǵdarlamanyń múmkindikteri jarıa etiledi.

"Memlekettik baǵdarlamada jaqsy tetikter bar, mysaly, qazaqtyń kýáligi. Bul sheteldegi qandastarymyzǵa Qazaqstanda saıası quqyqtardan basqa kóptegen quqyqty bizdiń eldiń azamattarymen teń jaǵdaıda paıdalanýǵa múmkindik beretin qujat", – dedi «Otandastar» qorynyń birinshi vıse-prezıdenti.

Qazaqstan azamattarynyń saıası quqyqtaryna qoǵamdyq uıymdar qurý, saılaýlar men daýys berýge, beıbit jınalystar men mıtıńilerge qatysý kiredi. «Otandastar» qory 2017 jyly Qazaqstannyń tuńǵysh prezıdenti Nursultan Nazarbaevtyń tapsyrmasymen quryldy.

Qordyń maqsaty – álemdegi otandastarǵa qoldaý kórsetý, qazaq dıasporalaryn biriktirý jáne Dúnıejúzilik qazaqtar qaýymdastyǵynyń rólin kúsheıtý.