Kıpr eline ushqaly turǵan jerinen saparynan qalyp qoıǵan Aleksandr Mılko apelásıalyq sotta jeńip shyqty. Taldyqorǵandyq turǵynnyń eshqandaı qaryzy bolmasa da, áýejaıdaǵy mamandar ony ushaqqa ótkizbeı qoıǵan. Sebebi, málimetter bazasynda oǵan shetelge shyǵýǵa tyıym salynǵany jóninde aqparat shyqqan, – dep Qamshy.kz aqparat agenttigi habarlaıdy.

Sot barysynda Aleksandr Mılkonyń eshqandaı da bereshegi joq bolyp shyqty. Al Mılkoǵa shet elge shyǵýǵa shekteý 2012 jyly qoıylyp, 2014 jyly alynyp tastalǵan. Shekteý alynǵannan keıin ol birneshe ret shet elge barǵan. Biraq 2018 jyly aıaq asty oǵan 6 jyl buryn qoıylǵan shekteýdiń nelikten qaıtadan bazaǵa shyǵyp ketkeni belgisiz.

"Almaty oblystyq ádilet departamentinen Aleksandr Mılkonyń paıdasyna 378 716 teńge materıaldyq shyǵyn, 50 myń teńge moraldyq ótemaqy jáne 9126 teńge sot shyǵyndary óndirilsin", – dedi sot alqasynyń sheshimin oqyǵan Almaty oblystyq apelásıalyq sot alqasynyń sýdıasy Qarlyǵash Japsarbaeva.

Aleksandr Mılko óziniń kinásizdigin bir jyldan asa ýaqyt boıy dáleldedi.

Ol Ulttyq qaýipsizdik qyzmeti, Ádilet mınıstrligi men Almaty oblystyq ádilet departamentin sotqa bergen bolatyn.

"Konstıtýsıalyq quqyǵymnyń buzylǵanyn dáleldeý úshin bir jyldan asa ýaqyt ketti. Qazaqstanda ádildik bar ekenine áıteýir kózim jetti. Eń bastysy, meniń bereshegim joq, al shekteýdiń bazada qaıta shyǵyp ketkenine men kináli emespin. Almaty oblystyq apelásıalyq sot alqasyna isti jan-jaqty, ádiletti qaraǵany úshin alǵys aıtamyn. Sot sheshimimen tolyqtaı kelisemin", – dedi Aleksandr Mılko.

Eske salsaq, jeke sot oryndaýshylardyń respýblıkalyq palatasynyń resmı málimdeýinshe, Qazaqstanda salyq, alıment, nesıe syndy túrli bereshegi bar 1 mln 300 myńnan asa adamǵa elden shyǵýǵa tyıym salynǵan.