Almaty ákimi Baqytjan Saǵyntaev ishki ister mınıstri Erlan Turǵymbaevtyń qatysýymen qoǵamdyq qaýipsizdikti qamtamasyz etý jáne jol-kólik oqıǵalarynyń aldyn-alý máseleleri boıynsha keńes ótkizdi, dep jazady ákimdiktiń baspasóz qyzmeti.

Negizgi mindet – qyzmet kórsetýdiń servıstik úlgisine basymdyq bere otyryp, Almaty polısıasynyń jumysyn qaıta qurý. Ýchaskelik ınspektorlar, patrúlder qala turǵyndary men qonaqtaryna olardyń máselelerin sheshýge kómektesýleri tıis.

«Qoǵamnyń basty talaby – sapaly jáne qoljetimdi medısınalyq qyzmet, bilim men qoǵamdyq qaýipsizdik. Biz osylardy qamtamasyz etýge tıispiz», – dedi keńesti ashqan Baqytjan Saǵyntaev.

İİM-niń basshysy polısıanyń jedel basqarý ortalyǵyn modernızasıalaý jáne JBO-da vıdeobaqylaý júıesin ıntegrasıalaý josparlary týraly aıtty. Jol oqıǵalary erekshe nazar aýdarýdy qajet etedi. Jyl basynan beri qaraı megapolıste 4 myńǵa jýyq JKO bolǵan.

«Biz qazirgi kezde halyq sany men avtomobıl trafıginiń kóp bolýyna qaramastan pármendi sharalardy qoldana otyryp, joldardaǵy apattar men ólim-jitimdi kúrt azaıtqan sheteldiń tájirıbesin belsendi túrde úırenýdemiz», – dep atap ótti İİM-niń basshysy.

Qala ákimdigi quqyqtyq tártipti qamtamasyz etýde, onyń ishinde zamanaýı megapolısterdiń ozyq tájirıbesin paıdalana otyryp, jol ınfraqurylymyn qaıta qurý jóninde polısıanyń bastamalaryn qoldaıtyn bolady. Bular – «vafeldi» belgiler, jolaqtar boıynsha burylystardaǵy qozǵalystardyń núkteleri, qosymsha baǵdarshamdar jáne magıstraldi kóshelerdegi bólgish qorshaýlar.

– Adam ómirin aqshamen ólsheýge bolmaıdy. Qalanyń kólik ınfraqurylymy qozǵalystyń barynsha qaýipsizdigin qamtamasyz etý úshin barlyq jaǵdaılardy jasaýy qajet, – dep atap ótti B. Saǵyntaev ári qalalyq mobıldilik basqarmasyna bul máseleni polısıa departamentimen birge sheshýdi tapsyrdy.