11 sáýirde aýrýhananyń eki qyzmetkerinen koronavırýs anyqtalǵany habarlanǵan. Sol kúni barlyq qyzmetkerlerge test jasaldy. Aýrýhananyń gınekologıa bóliminiń dárigeri Dmıtrıı Saıdyń sózinshe, 182 medqyzmetkerdiń analızi oń nátıje kórsetken. Dárigerlerdi "Kóktem" shıpajaıy, İİM-nyń sanatorııindegi provızorlyq ortalyqtarǵa aparǵan. Dárigerlerdiń bir bóligi aýrýhanada qalǵan.

12 sáýirde Almaty qalalyq taýarlar men qyzmetter sapasy men qaýipsizdigin baqylaý departamentiniń basshysy, qalalyq bas sanıtarlyq dáriger Aızat Moldaǵasymova jappaı juqtyrý dereginiń bir sebebi dárigerlerdiń saqtyq sharalaryn saqtamaýy ekenin aıtyp, kináni dárigerlerdiń ózine artqan.

Sanıtarlyq dárigerdiń bul sózderin №12 Ortalyq qalalyq klınıkalyq aýrýhananyń medqyzmetkerleri "negizsiz aıyptaý" dep, departament basshysynyń otstavkasyn talap etti.

– Sanıtarlyq dáriger bizdi ındıvıdýaldyq qorǵanys quraldaryn qoldanbady, sol úshin qylmystyq jaýapkershilikke tartý kerek dep aıtty. Klınıka qyzmetkerleri buǵan tolyqtaı narazy. Biz bunyń bári ótirik ekenin aıtyp, prezıdentke ujymdyq hat jazdyq, – dedi Dmıtrıı Saı.  

Gınekologıa bóliminiń meńgerýshisi Gaýhar Ámireeva men taǵy 33 dáriger Aızat Moldaǵasymovany sotqa bermek. Olar "sanıtarlyq dáriger bizge kúıe jaqty" dep otyr.

Onyń aıtýynsha, dárigerler tótenshe jaǵdaı rejımi engen sátten qorǵanys quraldarymen jaraqtandyrylǵan. Aýrýhana dırektory qalanyń syrtynda turatyn qyzmetkerlerdi tegin jataqhanamen, as-sýmen, avtobýspen qamtamasyz etken.

Aızat Moldaǵasymova informburo.kz tilshisine "vırýsty juqtyrǵandaryńyz úshin ózderińiz kinálisizder dep eshkim eshkimdi aıyptaǵan joq. Medıkter únemi qaýip-qaterdiń ortasynda júredi. Meniń sózderimdi kimniń, ne dep burmalaǵanyn bilmeımin. Men dárigerler men naýqastardyń barlyǵy saqtyq sharalaryn saqtaý kerektigin aıttym" dep pikir bildirgen.

Búginde taýarlar men qyzmetter sapasy men qaýipsizdigin baqylaý departamenti indettiń órshý sebebin anyqtaý úshin aýrýhanada epıdemıologıalyq tergeý júrgizýde.

Test nátıjesi shyqpastan dárigerler nege aýrýhanaǵa jatqyzylmaq boldy?

Gaýhar Ámireeva "mundaǵylardyń bári naýqastarmen baılanysta bolǵandar. Báriniń analızi teris nátıje kórsetken. Men bul áreketti Aızat Moldaǵasymovany sotqa beretinimizdi aıtyp, facebook-qa jarıalaǵan jazbammen baılanystyramyn" dedi.

Gaýhar Ámireevanyń nátıjesi teris shyqqanyna qaramastan, naýqastar jatqan jerge alyp ketýge tyrysý deregin Aızat Moldaǵasymova "Ámireevanyń analız qorytyndysyn onymen attas adamnyń nátıjesimen shatastyryp alyppyz" dep túsindirdi.

Onyń sózinshe, zerthanaǵa G.Ámireeva degen 2 adamnyń nátıjesi túsken.

– Onyń bireýinde nátıje oń. Laborant durys jazbaǵan shyǵar, gınekologıa bóliminiń meńgerýshisi Gaýhar Ámireevanyń nátıjesi teris. Ony provızorlyq ortalyqtan eshkim alyp ketpeıdi, – dedi ol.

Artynsha, qalalyq densaýlyq saqtaý basqarmasynyń basshysy Tileýhan Ábildaev pen densaýlyq saqtaý vıse-mınıstri Kamaljan Nadyrov Kóktem sanatorııine kelip, áriptesteri Gaýhar Ámireevadan jiberilgen qate úshin keshirim surady.

Kamaljan Nadyrov sanıtarlyq dárigerdiń sózinde qandaı da bir zań buzýshylyq anyqtalsa, tıisinshe jaýapqa tartylatynyn aıtty.

Aýrýhana qyzmetkerleri dárigerlerdiń jappaı vırýs juqtyrýyn naýqastardy jatqyzýda belgili bir rettiń bolmaýymen baılanystyrady.

Almatyda eki provızorlyq stasıonar bar. Koronavırýs kúdigine ilingender sol stasıonarǵa jatqyzylýǵa tıis. Alaıda medıkterdiń aıtýynsha, pnevmonıamen aýyrǵandardy №12Ortalyq qalalyq klınıkalyq aýrýhanasyna, №4, №7 qalalyq klınıkalyq aýrýhanalarǵa jetkizgen. Osylaısha, provızorlyq stasıonarlar karantındik stasıonarǵa aınalǵan.

– Qoǵamdyq densaýlyq saqtaý basqarmasynyń pýlmonologıalyq naýqastar men respıtatorlyq-vırýstyq belgileri bar pasıentterdi birge jatqyzý týraly buıryǵy baıaý áreket etetin mına ispettes edi. Bizdiń talaptarǵa qulaq asqan eshkim bolmady, – dedi №12 Ortalyq qalalyq klınıkalyq aýrýhanasynyń burynǵy bas dárigeri Almaz Jubashe facebook paraqshasynda.

№12 Ortalyq qalalyq klınıkalyq aýrýhanasy dárigerlerdi koronavırýstan qorǵaý úshin jeke provızorlyq bólim ashyp, Covid-19 analızderin sol jerde alǵan.

– Bizge táýligine 200-300 naýqas júginedi. Qaladaǵy eki klınıkanyń jabylýyna baılanysty olardyń sany eselep artty. Ár naýqasqa 1-2 adam ere keledi. Ár naýqas ózimen birge vırýs ákelgen bolýy múmkin. Emdik sharalar barysynda naýqaspen jaqyn baılanysqa túsýge týra keledi. Jeke qorǵanys quraly mundaıda vırýstyń juǵýynan 100 paıyzǵa qorǵaı almaıdy. Koronavırýs analıziniń qorytyndysy shyqqansha naýqasty ǵımaratqa kirgizbeı turýǵa taǵy bolmaıdy, – delingen Almaz Jubashev jazbasynda.

Onyń pikirinshe, vırýs juqtyrǵandar arasynda hırýrgıa bóliminiń mamandary da bar.

– Zertteý barysynda ótkir hırýrgıalyq patologıasy bar naýqastardan oń nátıje anyqtalǵan. Klınıkalyq kartına hırýrgıalyq syrqattardyń saldarynan birden kórinbegen bolýy múmkin. Qyzmetkerlerge koronavırýs osyndaı naýqastardan da juǵýy yqtımal, – dedi ol.

Terapıa bóliminiń meńgerýshisi Gaýhar Jálelova qabyldaý bólimi dárigerleriniń júktemesi tym aýyr bolǵanyn aıtty.

– Bizge qyzýy bar naýqastardy Talǵardan jetkizip jatty. Meniń terapevterim qaterge bas tikti. Sondyqtan olarǵa arnap jeke kiretin esik, kabınet, palata ázirlendi. Onda Covid-19 kúdigi boıynsha túskender qaraldy. Test nátıjesin úsh kún tostyq. Analız jasap bolǵansha baıaý jarylatyn mınanyń ústinde otyrdyq, – deıdi bólim meńgerýshisi.

Al búgin, 15 sáýirde №12 Ortalyq qalalyq klınıkalyq aýrýhanasynyń bas dárigeri Almaz Jubashevtyń óz erkimen qyzmetinen ketkeni belgili boldy.

Almaty qalalyq densaýlyq saqtaý basqarmasynyń basshysy Tileýhan Ábildaev "bas dáriger uıymdastyrýda ketken qatelikterin bilip, óz erkimen qyzmetten ketken bolýy múmkin" dep topshylaıdy.

Almaz Jubashevtyń ózi qyzmetten ketýine baılanysty pikir bildirgen joq.

Al aýrýhana dárigerleri beıneúndeý túsirip, Almaz Jubashevty qaıtyp ákelýdi talap etýde.