Aqtaý qalasyndaǵy Nazarbaev Zıatkerlik mektebiniń 6 oqýshysy Nazarbaev Ýnıversıtetiniń Direct bólimine tústi. Zıatkerlik mekteptiń 12-synyp oqýshylary  Aıgerim Shoraeva, Daıana Býlatbekova, Aıjuldyz Nadırhanova, Ámirbek Saǵyzbaev, Ǵalammadın Asqar, İńkár Ońash «Computer Science», «School of Engineering», «Digital Sciences» mamandyqtaryn tańdaǵan.

Bilim grantyn alǵan oqýshylarymyz oqýda ozat jáne ýnıversıtet talap etken barlyq emtıhandardy (IELTS,SAT, NUFYPET) sátti tapsyryp, joǵary nátıje kórsetti.

Nazarbaev ýnıversıtetine túsken 6 oqýshynyń bireýi ǵana ýnıversıtette bilim alatynyn naqtylady. Bir túlegimiz Ońtústik Koreıadaǵy oqý ornyna túsýine baılanysty bas tartty. Qalǵan oqýshylarymyz oılaný ústinde. Óıtkeni olar basqa da ýnıversıtetterge qujat tapsyrǵan edi. Solardyń jaýabyn kútip júr, - deıdi kásibı baǵdar berý boıynsha keńesshi Asel Ismahanbetova.

Aqtaýdaǵy Nazarbaev Zıatkerlik mektebimen bıyl 162 túlek qoshtasady. Bul mekteptiń bes jyldyq tarıhyndaǵy sany eń kóp túlek. Sondyqtan, qazirdiń ózinde 12-synyp oqýshylary óz múmkindikterin synap, bilim granttary úshin básekege túsip jatyr. Jalpy Nazarbaev Ýnıversıtetine bilim ordasynan 70-ten asa túlek oqýǵa ótinim tapsyrǵan.

Atalǵan ýnıversıtetke túsetin balalardyń sany áli de artady dep otyrmyz. Óıtkeni joǵary oqý orny erte túsimdi ǵana qarastyryp, grant berý týraly sheshim qabyldady. Áli ótinimder qaralý ústinde deıdi, - Asel Bahıtqyzy.