Quqyq qorǵaýshy Baqytjan Tóreǵojına 66 kún boıy ashtyq jasaǵan Marat Jylanbaevty aýrýhanaǵa jatqyzýdy talap etti. Bul týraly ol óziniń feısbýk paraqshasyna jazdy. 

"5 tamyzda Jylanbaevqa advokat Denıs Malúga kirgen. Ol Jylanbaevtyń ótinishimen jelide onyń qan synamalarynyń kórsetkishin jarıalady. Marat Jylanbaevtyń densaýlyǵyna baılanysty shaǵymdary bar", delingen jazbada. 

Sondaı-aq Baqytjan Tóreǵojınanyń aıtýynsha, Marat Jylanbaev BAQ ókilderi men halyqaralyq uıymdar ókilderiniń túrmege kelip, kezdesý uıymdastyrý úshin ótinish jazǵan. Bul ótinishti túrme ákimshiligi qabyldap, tirkegen. Alaıda qylmystyq atqarý-júıesi komıteti jáne Jylanbaev otyrǵan Stepnagrskidegi túrme ákimshiligi buǵan qatysty jaýap bermedi. 

Buǵan deıin de Marat Jylanbaevtyń densaýlyǵynyń gasharlaǵanyna qatysty aqparat taraǵan bolatyn. Alaıda qylmystyq atqarý-júıesi komıteti bul aqparatty joqqa shyǵardy. 

61 jastaǵy marafonshy, tirkelmegen opozısıalyq «Alǵa, Qazaqstan!» partıasy bastamashyl tobynyń jetekshisi Marat Jylanbaev sot sheshimimen jeti jylǵa sottalǵan. Oǵan «ekstremızmdi qarjylandyrý» jáne «ekstremıstik uıym jumysyna aralasý» baptary boıynsha aıyp taǵylǵan. Jylanbaevtyń ózi de, jaqtastary da taǵylǵan aıyppen de, úkimmen de kelispeıdi. Olar istiń saıası astary bar dep esepteıdi. Belsendiniń ózi úkimmen kelispeı birneshe ret ashtyq ta jarıalaǵan.