Áleýmettik jeliler men messendjerlerde "Qazaqstan azamattaryna, 1949–2010 jyldar aralyǵynda týǵandar úshin, 70 000 teńge kóleminde tólem jasalady" degen aqparat tarap jatyr. Alaıda Eńbek jáne halyqty áleýmettik qorǵaý mınıstrligi bul aqparattyń shyndyqqa janaspaıtynyn málimdedi.
"Áleýmettik jeliler men messendjerlerde tarap jatqan 70 000 teńge kólemindegi tólem týraly aqparat shyndyqqa sáıkes kelmeıdi. Belgisiz tulǵalar azamattarǵa silteme arqyly ótip, ótinim berýin usynady", – delingen mınıstrlik habarlamasynda.
Mınıstrlik alaıaqtar jiberilgen silteme arqyly jeke málimetterdi urlaýy múmkin ekenin aıtyp eskertý jasady.
"Siltemege esh jaǵdaıda ótpeńiz; Resmı aqparat tek 1414 nómirinen keletin SMS arqyly taratylady; Aqparatty tek resmı derekkózderden ǵana tekserińiz; Jalǵan aqparat taratqandar zańmen qýdalanady", delingen habarlamada.
