Qazaqstanda sottalǵandarǵa hımıalyq kastrasıany qoldaný erejesine ózgerister engizilmek.  «Ashyq NQA» portalynda jarıalanǵan buıryq jobasyna sáıkes, qylmystyq jaýapkershilikke tartylǵan pedofılderge hımıalyq kastrasıa túrmeden shyǵýǵa 6 aı qalǵanda taǵaıyndalady. 

Sonymen qatar sottalǵan adamnyń psıhıkalyq aýytqýlary men seksýal zorlyqqa beıimdiligin anyqtaý úshin bosatylýyna on eki aı qalǵanda sot-psıhıatrıalyq saraptama taǵaıyndaý týraly materıaldar sotqa jiberilýge tıis.

Eger saraptama qaýiptiń bar ekenin kórsetse, sot hımıalyq kastrasıany taǵaıyndaı alady. Bul shara bostandyqqa shyǵýǵa alty aı qalǵanda qoldanylýy múmkin. Prosedýra arnaıy preparattardy únemi egý arqyly júrgiziledi jáne tek sot sheshimimen ǵana júzege asyrylady.

Buıryq jobasy 18 tamyzǵa deıin qoǵamdyq talqylaýǵa shyǵarylǵan.

Eske salaıyq, Qazaqstanda pedofılderge qoldanylatyn 8 jyldyq ákimshilik baqylaýdyń ornyna ómir boıǵy baqylaý engizý usynylǵan. İshki ister mınıstriniń orynbasary Igor Lepehanyń aıtýynsha, resıdıv qaýpi bolsa, bul baqylaý ár alty aı saıyn sot sheshimimen uzartylyp otyrady.

Mundaı baqylaý aıasynda kelesi shekteýler qarastyrylǵan:

• mektepter men balalar mekemelerine barýǵa tyıym;
• túngi ýaqytta úıden shyǵýǵa shekteý;
• basqa da shekteýler.