Ánýarbek Bımaǵambet «Mańǵystaý Medıanyń» basshysy bolyp taǵaıyndaldy.

Búgin Mańǵystaý oblysy ákiminiń orynbasary Abat Órisbaev jańa basshyny ujymǵa tanystyryp, qyzmetine sáttilik tiledi. 

Ánýarbek Qosymuly Bımaǵambet 1980 jyly Mańǵystaý aýdany, Qosbulaq aýylynda týǵan. Mańǵystaý gýmanıtarlyq-ekonomıka kolejin, Aqtóbe memlekettik pedagogıka ınstıtýtyn támamdaǵan. «TVT» telestýdıasynda, «Úsh qıan» respýblıkalyq gazetinde menshikti tilshi (1999 – 2002), respýblıkalyq «Habar» agenttigi men «Qazaqstan» ulttyq telearnasynyń Mańǵystaý oblysyndaǵy menshikti tilshisi (2002 – 2005) bolǵan. 2005 jyldan Mańǵystaý oblysy ákimi baspasóz qyzmetiniń jetekshisi, «Sherqala», «Ábish álemi» jýrnaldarynyń bas redaktory boldy. «Qazaqstan» RTRK Mańǵystaý oblystyq fılıalynyń dırektory, «AQTAU» telearnasynyń dırektory qyzmetin atqarǵan. 

2024 jyldyń qarashasynan búginge deıin Mańǵystaý oblysy ákimi apparaty basshysynyń orynbasary qyzmetin atqardy.

Ol «Jetimtoǵaı japyraǵy» jyr jınaǵynyń (2006) avtory. «Kaspıı – dostyq teńizi» festıvaliniń, respýblıkalyq Shotan batyrǵa arnalǵan músháıranyń jeńimpazy, respýblıkalyq «Meniń atym – Mahambet» telemúsháırasynyń jáne halyqaralyq «Shabyt» festıvaliniń laýreaty. «Aqparat salasynyń úzdigi» tósbelgisi jáne «Qurmet» ordeniniń ıegeri.